Փաշինյանը չբացառեց ՀԱՊԿ–ի հետ կապված իրավիճակի փոփոխությունը, եթե Բելառուսը դուրս գա կառույցից
2 րոպեի ընթերցում
ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանը չի բացառում Հայաստանի ու ՀԱՊԿ-ի հարաբերություններում իրավիճակի փոփոխությունը, եթե Բելառուսը դուրս գա կառույցից կամ այդ երկրի նախագահ Ալեքսանդր Լուկաշենկոն ներողություն խնդրի հայ ժողովրդից:
«Արմենպրես»-ի հաղորդմամբ՝ Փաշինյանն այս մասին հայտարարեց խորհրդարանի ամբիոնից ունեցած ելույթում:
«ՀԱՊԿ–ի հետ կապված կարո՞ղ է արդյոք որևէ բան փոխվել, տեսականորեն չի կարող բացառվել, եթե, օրինակ, Բելառուսն ինքը որոշի ՀԱՊԿ–ից դուրս գալ կամ Բելառուսի նախագահը Հայաստանի ժողովրդին ներողության կամ բացատրության այնպիսի խոսքեր ասի, որոնք Հայաստանի ժողովրդի համար կլինեն ընդունելի»,–ասաց Փաշինյանը:
Ավելի վաղ վարչապետը հիշեցրել էր, որ ՀԱՊԿ անդամ Բելառուսի նախագահը հայտարարել է, թե 44–օրյա պատերազմը նախապատրաստելուն մասնակցել է, քաջալերել է, հավատացել է, ցանկացել է Ադրբեջանի հաղթանակը: Վարչապետն ասել է, դրանից հետո ինքը չի պատրաստվում ՀԱՊԿ ֆորմատում նրա հետ հարց քննարկել: Փաշինյանը նաև նշել էր, որ ինքը և ՀՀ պաշտոնական ոչ մի ներկայացուցիչ Բելառուս չեն այցելի, քանի դեռ այդ երկրի նախագահն Ալեքսանդր Լուկաշենկոն է:
Հայաստանը սառեցրել է մասնակցությունը ՀԱՊԿ–ում։