Եթե պարզվի, որ օրենքից դուրս որևէ բան է եղել, կտրվի համապատասխան արձագանք. Փաշինյանը՝ ոստիկանների գործողությունների մասին
2 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Բաղրամյան–Դեմիրճյան փողոցների հատվածում տեղի ունեցածի հետ կապված կուսումնասիրվեն բոլոր լուսանկարները, եթե պարզվի, որ օրենսդրությունից դուրս որևէ բան է տեղի ունեցել, կտրվի համապատասխան արձագանք:
«Արմենպրես»-ի հաղորդմամբ՝ այս մասին ԱԺ–ում կառավարության հետ հարցուպատասխանին վստահեցրեց ՀՀ վարչապետ Նիկոլ Փաշինյանը:
«Հայաստան» խմբակցության պատգամավոր Աննա Գրիգորյանը նշեց մի նկարի մասին, որտեղ երևում է, որ բողոքի ակցիայի մասնակիցներից մեկի ձեռքը կտրված է:
«Բոլոր լուսանկարները կնայվեն, կհետազոտվեն, կուսումնասիրվեն, կքննվեն: Եվ, եթե կպարզվի, որ ՀՀ օրենսդրությունից դուրս որևէ բան է տեղի ունեցել, պետական ինստիտուտները կտան համապատասխան արձագանք»,–վստահեցրեց Փաշինյանը:
Բաղրամյան-Դեմիրճյան փողոցների հատվածում «Տավուշ հանուն հայրենիք»-ի շարժման մասնակիցները փորձել են ճեղքել ոստիկանական պատնեշը և մոտենալ Ազգային ժողովի շենքին, որից հետո սկսվել է քաշքշուք և հրմշտոց։ Այնուհետև ոստիկանությունը հատուկ միջոցներ է կիրառել ցուցարարների նկատմամբ։ Ոստիկանները բերման են ենթարկում բողոքի ակցիայի մասնակիցներին։ Նշված հատվածում իրավիճակը շարունակում է լարված մնալ։