1 րոպեի ընթերցում
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ։ Ադրբեջանի արտգործնախարար Ջեյհուն Բայրամովը Բաքվի և Երևանի միջև խաղաղության գործընթացը քննարկել է ԱՄՆ Պետքարտուղարության՝ Կովկասում բանակցությունների գծով ավագ խորհրդական Լուի Բոնոյի հետ։
«Արմենպրես»-ի փոխանցմամբ այս մասին հայտնում են ադրբեջանական լրատվամիջոցները։
Հաղորդվում է, որ Բայրամովն իր զրուցակցին մանրամասն տեղեկացրել է հետհակամարտային շրջանում տարածաշրջանում տիրող իրավիճակի, կարգավորման և խաղաղ գործընթացի շուրջ Ադրբեջանի և Հայաստանի միջև ընթացող բանակցությունների, ինչպես նաև խաղաղության օրակարգում վերջերս ձեռք բերված առաջընթացի մասին։
Բայրամովի խոսքով՝ մայիսի 10-11-ին Ալմաթիում Ադրբեջանի և Հայաստանի արտաքին գործերի նախարարների մակարդակով կայացած բանակցությունները վկայում են նաև երկկողմ խաղաղ գործընթացի արդյունավետության մասին։
«Վերջին շրջանում տարածաշրջանում տեղի ունեցող գործընթացները հույս են ներշնչում խաղաղության հաստատման գործունեության ապագայի համար»,- ասել է Լուի Բոնոն։
Նա նաև հայտնել է ԱՄՆ-ի պատրաստակամությունն՝ աջակցելու և նպաստելու Ադրբեջանի և Հայաստանի միջև բանակցային գործընթացին։