1 րոպեի ընթերցում
ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ։ ԱՄՆ պետքարտուղար Էնթոնի Բլինքենը ժամանել է Մոլդովայի մայրաքաղաք Քիշնև՝ մեկնարկելով իր կարճատև եվրոպական շրջագայությունը, որի նպատակն է ՆԱՏՕ-ի անդամ երկրների և նրանց հարևանների շրջանում ամրապնդել աջակցությունն Ուկրաինային։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Բլինքենը հանդիպում կունենա Մոլդովայի նախագահ Մայա Սանդուի և այլ բարձրաստիճան պաշտոնյաների հետ։
ԱՄՆ պետքարտուղարության՝ Եվրոպայի հարցերով բարձրաստիճան դիվանագետ Ջիմ Օ'Բրայենն ավելի վաղ լրագրողներին հայտնել էր, որ ԱՄՆ-ն, ամենայն հավանականությամբ, կհայտարարի Մոլդովայի էներգետիկ անկախությանն ուղղված աջակցության փաթեթի մասին։
Այս շաբաթ ավելի ուշ Բլինքենը կմեկնի Պրահա․ այնտեղ նա կմասնակցի ՆԱՏՕ-ի երկրների արտգործնախարարների ոչ պաշտոնական հանդիպմանը, որը կենտրոնացած կլինի դաշինքի՝ Վաշինգտոնում հուլիսին կայանալիք գագաթնաժողովի նախապատրաստական աշխատանքների վրա։