«Խաղաղության խաչմերուկ»–ը պետք է դառնա Հայաստան–Վրաստան ռազմավարական գործընկերության ապագա թեմաներից մեկը․ Փաշինյան

ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ։ Հայաստանի վարչապետն այն կարծիքին է, որ ՀՀ-ի կողմից առաջ քաշված «Խաղաղության խաչմերուկ» նախագիծը պետք է դառնա Հայաստանի և Վրաստանի ռազմավարական գործընկերության ապագա թեմաներից մեկը

«Արմենպրես»-ի փոխանցմամբ՝ Հայաստանի վարչապետ Նիկոլ Փաշինյանն այս մասին հայտարարեց Վրաստանի վարչապետ Իրակլի Կոբախիձեի հետ Երևանում ունեցած հանդիպումից հետո հայտարարության ժամանակ։

«Կարծում ենք, որ Հայաստանի կառավարության կողմից առաջ քաշված «Խաղաղության խաչմերուկ» նախագիծը պետք է դառնա մեր երկրների ռազմավարական գործընկերության ապագա թեմաներից մեկը»,- Ադրբեջանի հետ հարաբերությունների կարգավորման, տարածաշրջանում խաղաղության և կայունության ուղղությամբ ջանքերի համատեքստում ասաց Փաշինյանը:

Նա հավելեց՝ Հայաստանի և Վրաստանի հարաբերությունները դինամիկ զարգացում են ապրում։ Հայաստանի կառավարությունը շարունակելու է ջանքեր գործադրել՝ ձեռք բերածով չբավարարվելու և երկու երկրների հարաբերություններում նոր հորիզոններ բացելու համար։