Հրշեջները մարել են Երևանի Ջիվանու փողոցի երկու տների ընդհանուր տանիքում բռնկված հրդեհը

ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ։ Ճգնաժամային կառավարման ազգային կենտրոնը մարտի 5-ին, ժամը 14:32-ին ահազանգ է ստացել, որ հրդեհ է բռնկվել Երևանի Ջիվանու փողոցի տներից մեկում։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երկու մարտական հաշվարկ:

Ըստ աղբյուրի՝ պարզվել է, որ հրդեհը բռնկվել է Ջիվանու փողոցի երկու տների ընդհանուր տանիքում (մոտ 80 քմ)։

Նշվում է, որ հրդեհը մեկուսացվել է ժամը 15։09-ին, մարվել՝ 15։22-ին։ Այրվել է ընդհանուր տանիքի մոտ 40 քմ հատվածը։