Դավիթ Խուդաթյանը կնշանակվի Արմավիրի մարզպետ․ հարցը կառավարության նիստի օրակարգում է
1 րոպեի ընթերցում
ԵՐԵՎԱՆ,11 ՀՈՒՆՎԱՐԻ, ԱՐՄԵՆՊՐԵՍ։ Հայաստանի կառավարության չզեկուցվող հարցերի օրակարգում է Դավիթ Խուդաթյանին Արմավիրի մարզպետ նշանակելու հարցը։
«Արմենպրես»-ի փոխանցմամբ՝ Կառավարության նիստի մեկնարկին չզեկուցվող հարցերի փաթեթի հետ միասին քվեարկության կդրվի նաև Խուդաթյանին Արմավիրի մարզպետ նշանակելու հարցը։
Հունվարի 5-ին կառավարության որոշմամբ Արմավիրի մարզպետի պաշտոնից ազատվել էր Էդվարդ Հովհաննիսյանը։
Դավիթ Խուդաթյանը Արմավիր խոշորացված համայնքի ղեկավարն է և «Քաղաքացիական պայմանագիր» կուսակցության Արմավիրի տարածքային խորհրդի նախագահը։