Արծվիկ Մինասյանն այժմ Հռոմի ստատուտի քննարկումը հակասահմանադրական է համարում. Եղիշե Կիրակոսյանը հակադարձում է

ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովի «Հայաստան» խմբակցությունն առանց սահմանադրական փոփոխությունների Հռոմի ստատուտի քննարկումը հակասահմանադրական է համարում, Միջազգային իրավական հարցերով ՀՀ ներկայացուցիչ Եղիշե Կիրակոսյանը հակադարձում է՝ Սահմանադրական դատարանի որոշումը հստակ է:

«Արմենպրես»-ի հաղորդմամբ՝ ԱԺ-ում 1998 թվականի հուլիսի 17-ին ստորագրված` Միջազգային քրեական դատարանի Հռոմի կանոնադրությունը վավերացնելու և կանոնադրության 12-րդ հոդվածի 3-րդ մասի համաձայն Միջազգային քրեական դատարանի իրավազորությունը հետադարձորեն ճանաչելու մասին հայտարարություն ընդունելու մասին նախագծի քննարկմանը «Հայաստան» խմբակցության քարտուղար Արծվիկ Մինասյանը կարծիք հայտնեց, որ հարցը հակասահմանադրական ընթացակարգով է ներառված օրակարգում:

«ԱԺ-ն իրավասու չէ Հռոմի ստատուտը վավերացնելու հարցը քննարկման առարկա դարձնել առանց սահմանադրական փոփոխությունների ՝ իր բազմաթիվ ռիսկերով հանդերձ: Դրանց վերաբերյալ կարիք կար ամբողջական, խորը և պաշտպանական բոլորը գործողությունները ձեռնարկելուց հետո նոր անել դա»,-ասաց «Հայաստան» խմբակցության քարտուղար Արծվիկ Մինասյանը:

Միջազգային իրավական հարցերով Հայաստանի ներկայացուցիչ Եղիշե Կիրակոսյանն ավելի ուշ, անդրադառնալով Մինասյանի մտահոգությանը, ասաց, որ սահմանադրականության հետ կապված հարցի գնահատականը ՀՀ Սահմանադրության համաձայն՝ վերապահված է միայն ՍԴ-ին:

«Սահմանադրական դատարանը կարող է որոշում կայացնել պայմանագրերի սահմանադրական հարցի վերաբերյալ: Կարծում եմ՝ այստեղ այլ կարծիք լինել չի կարող: ՍԴ-ի որոշումը կա և շատ հստակ է, դա վիճարկելը, կարծում եմ, տեղին չէ»,-ասաց Կիրակոսյանը: