Ֆրանսիան առաջին պետություններից էր, որը դատապարտեց Ադրբեջանի հանցավոր գործողությունները. Գրիգոր Մինասյանն ընդունել է Հայաստանում Ֆրանսիայի դեսպանին

ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության արդարադատության նախարար Գրիգոր Մինասյանը սեպտեմբերի 25-ին ընդունել է Հայաստանում Ֆրանսիայի արտակարգ և լիազոր դեսպան Օլիվիե Դըկոտինյիին:

Ինչպես «Արմենպրես»-ը տեղեկանում է Արդարադատության նախարարության տարածած հաղորդագրությունից, նախարարը շնորհակալություն է հայտնել Ֆրանսիային, քանի որ այն առաջին պետություններից էր, որը տարածաշրջանային անվտանգային իրավիճակի և Լեռնային Ղարաբաղի ժողովրդի նկատմամբ Ադրբեջանի կողմից հերթական լայնածավալ ագրեսիայի կապակցությամբ ուղիղ դատապարտեց Ադրբեջանին՝ նշելով վերջինիս հանցավոր գործողությունները Լեռնային Ղարաբաղի խաղաղ բնակչության նկատմամբ։

Նախարարը կարևորել է նաև սեպտեմբերի 22-ին ՄԱԿ Անվտանգության խորհրդի նիստը գումարելու Ֆրանսիայի նախաձեռնության, ինչպես նաև սույն նիստի շրջանակներում Ֆրանսիայի արտահայտած դիրքորոշման համար։

Գրիգոր Մինասյանն ընդգծել է, որ Հայաստանի Հանրապետության համար կարևոր է նաև սեպտեմբերի 24-ին Ֆրանսիայի Հանրապետության նախագահ Էմանուել Մակրոնի՝ Ֆրանսիական TF1 հեռուստաընկերությանը տված հարցազրույցի ընթացքում ևս մեկ անգամ հնչեցրած վերահաստատումը՝ Հայաստանի տարածքային ամբողջականության պահպանման և այդ ուղղությամբ Ֆրանսիայի աջակցության պատրաստակամության վերաբերյալ:

Դեսպանը շնորհակալություն է հայտնել ընդունելության համար և ընդգծել, որ Լեռնային Ղարաբաղի շուրջ ստեղծված իրավիճակն իրապես մտահոգիչ է: Օլիվիե Դըկոտինյինը նշել է, որ Ֆրանսիական կողմը արձանագրել և տարբեր խողովակներով դատապարտել է խաղաղ բնակչության և քաղաքացիական ենթակառուցվածքների հրետակոծման և ապօրինի գերեվարումների դեպքերը:

Նախարարն ու դեսպանն անդրադարձել են նաև Երևանում ընթացող ցույցերին ու անհնազանդության ակցիաներին: Քննարկվել են այս գործընթացների արտաքին ազդեցության հանգամանքները: Անդրադարձ է կատարվել նաև ցույցերի ընթացքում գործադրվող ոստիկանական գործողություններին և դրանց հետևող իրավական գործընթացներին: Դեսպանը նշել է, որ Ֆրանսիայում գործում է հանրային կարգի պաշտպանության դոկտրին և դրա վերահսկողության մեխանիզմներ, որի վերաբերյալ ֆրանսիական կողմն ուրախ կլինի կազմակերպել փորձի փոխանակում:

Անցնելով օրակարգային հարցերին՝ կողմերը քննարկել են ընթացող դատաիրավական բարեփոխումների օրակարգը: Դեսպան Դըկոտինյին բարձր է գնահատել Արդարադատության նախարարության կողմից իրականացվող քայլերն՝ ուղղված այդ օրակարգի հետևողական իրականացման, իրավունքի գերակայության և ժողովրդավարական ինստիտուտների ամրապնդման ուղղությամբ, նշելով, որ այդ զարգացումները կարևոր են ոչ միայն ժողովրդավարական բարեփոխումների այլ նաև ներդրումային միջավայրի բարելավման ենթատեքստում:

Երկուստեք կարևորվել է Արդարադատության նախարարության և Ֆրանսիայի Հանրապետության միջև ունեցած ամուր գործընկերությունը և վերջին տարիններին Ֆրանսիայի դեսպանատան աջակցությամբ իրականացված ծրագրերն ուղղված Հայաստանում արդարադատության համակարգի ամրապնդմանն ու դատաիրավական բարեփոխումների և արդարադատության մատչելիությանը:

Կողմերը քննարկել են նաև Արդարադատության նախարարության և Հայաստանում ֆրանսիական համալսարան հիմնադրամի միջև համագործակցության ընթացքը և հեռանկարները, մասնավորապես համալսարանի ուսանողների տեսական գիտելիքների գործնական կիրառումը նախարարության գործառույթների շրջանականերում:

Նախարարն ու դեսպանը քննարկել են Հռոմի ստատուտի վավերացման գործընթացն ու այդ ուղղությամբ հնարավոր համագործակցությունը: Քննարկվել է նաև Հայաստանում արբիտրաժային կենտրոնի ստեղծման գործընթացն ու այս համատեքստում փորձի փոխանակման հնարավորությունը:

Հանդիպմանն անդրադարձ է կատարվել դատավորների նկատմամբ հարուցվող կարգապահական վարույթներին: Նախարարը նշել է, որ ներկայիս օրենսդրությունը հնարավորություն է տալիս ուսումնասիրել Մարդու իրավունքների եվրոպական դատարանի կողմից կայացված վճիռներն ու խախտումներ հայտնաբերելու դեպքում՝ կարգապահական պատասխանատվության ենթարկել դատավորներին:

Նախարարն ու դեսպանը քննարկել են երկուստեք հետաքրքրություն ներկայացնող այլ հարցեր: