Երևանի և Բաքվի միջև լարվածության աճը բարդացնում է տրանսպորտային հաղորդակցությունների ապաշրջափակման շուրջ աշխատանքը․ Օվերչուկ
2 րոպեի ընթերցում
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ։ Անդրկովկասում տրանսպորտային կապերի ապաշրջափակման շուրջ եռակողմ աշխատանքային խմբի բանակցությունները շարունակվում են, սակայն Հայաստանի և Ադրբեջանի միջև հարաբերությունների սրացումը բացասաբար է անդրադառնում այդ գործունեության վրա։ «Արմենպրես»-ի փոխանցմամբ՝ այս մասին լրագրողներին ասել է ՌԴ փոխվարչապետ Ալեքսեյ Օվերչուկը Արևելյան տնտեսական ֆորումի շրջանակներում։
«Իհարկե, ցանկացած սրացում միշտ բացասաբար է անդրադառնում մեր աշխատանքի վրա, հետ է գցում, դանդաղեցնում է այն, և ժամանակ է անցնում, մինչև նորից վերադառնում ենք, նստում ենք և սկսում աշխատել», - Օվերչուկի խոսքերն է մեջբերում ТАСС գործակալությունը:
ՌԴ փոխվարչապետը հավելել է, որ բանակցությունները չեն դադարեցվել, շարունակվում են։
Օվերչուկի խոսքով՝ տարածաշրջանում տրանսպորտային հաղորդակցությունների ապաշրջափակման շուրջ Ռուսաստանի, Հայաստանի և Ադրբեջանի փոխվարչապետների հաջորդ հանդիպումը տեղի կունենա, երբ դրա համար պայմաններ հասունանան։
Ավելի վաղ՝ աշխատանքային խմբի վերջին հանդիպումից հետո, ՌԴ փոխվարչապետը զգալի առաջընթաց էր արձանագրել Ադրբեջանի և Հայաստանի միջև տրանսպորտային հաղորդակցությունների ապաշրջափակման շուրջ համաձայնության գալու հարցում։
Կողմերի միջև վերջին հանդիպումը տեղի է ունեցել հունիսի 2-ին։