1 րոպեի ընթերցում
ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ։ Ադրբեջանի արտաքին գործերի նախարար Ջեյհուն Բայրամովը հուլիսի 14-ին հանդիպել է Կարմիր խաչի միջազգային կազմակերպության Բաքվի գրասենյակի ղեկավար Դրագանա Կոժիչի հետ։
Ինչպես հաղորդում է «Արմենպրես»-ը, այս մասին հաղորդագրություն է տարածել Ադրբեջանի արտաքին գործերի նախարարությունը։
Ըստ հաղորդագրության քննարկվել են Ադրբեջանի և ԿԽՄԿ-ի համագործակցության հարցեր։
Հանդիպման ընթացքում քննարկվել է նաև Ադրբեջանի կողմից Լաչինի միջանցքում տեղադրված ապօրինի անցակետն ամբողջությամբ փակելու հետևանքով Արցախում ստեղծված հումանիտար իրավիճակը։
Ադրբեջանական կողմը հերթական անգամ պնդել է իր կեղծ թեզը, թե պատրաստ են ապահովել բուժօգնության կարիք ունեցողների տեղաշարժը միջանցքով՝ ԿԽՄԿ-ի միջնորդությամբ, եթե պահպանվեն անցակետի կանոնները։
Չնայած այն հանգամանքին, որ Բաքուն պարբերաբար հերքում է Արցախում հումանիտար ճգնաժամի առկայության փաստն ու կեղծ ու մանիպուլյատիվ տեղեկություններ է տարածում Արցախում տիրող իրավիկճակի վերաբերյալ՝ Ադրբեջանի ԱԳ նախարարը հայտարարել է Աղդամ-Ստեփանակերտ ճանապարհն օգտագործելու եղանակով արցախահայերին օգնելու պատրաստակամության մասին։