Իրանի հարավ-արևելքում ավելի քան հազար մարդ է տուժել ավազամրրիկներից
1 րոպեի ընթերցում
![Իրանի հարավ-արևելքում ավելի քան հազար մարդ է տուժել ավազամրրիկներից](http://armenpress.am/resized/480/static/news/b/2023/07/1114911.jpg)
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Իրանի հարավ-արևելյան Սիստան և Բելուջիստանի նահանգում ավելի քան 1000 մարդ է տուժել է ավազամրրիկներից։ «Արմենպրես»-ն այս մասին տեղեկանում է ТАСС գործակալությունից։
«120-օրյա քամիների նոր ալիքը պատել է Սիստանի տարածաշրջանը, ներառյալ՝ նահանգի հյուսիսի հինգ մարզերը՝ Զաբոլը, Զահակը, Համունը, Հիրմանդը և Նիմրուզը: Հուլիսի 2-ից մինչ օրս տարածաշրջանի բժշկական կենտրոններ դիմած մարդկանց ընդհանուր թիվը կազմել է 1010», - հայտնել է նահանգի ճգնաժամային վարչության գլխավոր տնօրեն Մաջիդ Մոհեբին։
162 տուժած հոսպիտալացվել է, մնացածը ամբուլատոր բուժում են անցել։ Բժշկական օգնության դիմողները գանգատվել են շնչառության, աչքերի և սրտի հետ կապված խնդիրներից:
Տարածաշրջանում աշխատում են Կարմիր մահիկի աշխատակիցները, որոնք մոտ 3800 դիմակ են բաժանել Սիստան և Բելուջիստանի բնակիչներին: