2 րոպեի ընթերցում
ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ։ Հայաստանում Դոմինիկյան Հանրապետության դեսպանությունը (նստավայրը՝ Մոսկվա) կազմակերպել էր ընդունելություն՝ Երևանում Դոմինիկյան Հանրապետության դիվանագիտական ներկայացուցչության գրասենյակի բացման և Դոմինիկյան Հանրապետության Անկախության 179-րդ տարեդարձի կապակցությամբ:
«Արմենպրես»-ի փոխանցմամբ՝ բացման խոսքով հանդես եկան ՀՀ ԱԳ նախարարի տեղակալ Պարույր Հովհաննիսյանը և Դոմինիկյան Հանրապետության դեսպան Հանս Դաննենբերգ Կաստեյանոսը: ԱԳ նախարարի տեղակալը նշեց, որ Հայաստանի և Դոմինիկյան Հանրապետության միջև հարաբերությունները թևակոխում են նոր փուլ, և դիվանագիտական ներկայացուցչության բացումը դրա լավագույն ապացույցն է:
Դոմինիկյան Հանրապետության դեսպան Հանս Դաննենբերգ Կաստեյանոսն էլ իր հերթին հավելեց, որ դոմինիկյան կողմը շահագրգիռ է զարգացնել Հայաստանի հետ հարաբերությունները փոխադարձ հետաքրքրություն ներկայացնող բոլոր ոլորտներում և իր երախտագիտությունը հայտնեց հայկական կողմին՝ Երևանում Դոմինիկյան Հանրապետության դիվանագիտական ներկայացուցչության բացման ողջ գործընթացի ընթացքում ցուցաբերած աջակցության համար:
Միջոցառմանը ներկա էին ՀՀ-ում հավատարմագրված օտարերկրյա դեսպաններ, դիվանագիտական կորպուսի անդամներ, Հայաստանի կրթական, գործարար, զբոսաշրջային շրջանակների ներկայացուցիչներ: