2 րոպեի ընթերցում
ԳՅՈՒՄՐԻ, 31 ՕԳՈՍՏՈՍԻ, ԱՐՄԵՆՊՐԵՍ: Գյումրիում այս տարի իրականացվում են 6 սուբվենցիոն ծրագրեր:
Ինչպես տեղեկացնում է «Արմենպրես»-ը՝ «Գյումրի համայնքի սոցիալական բնակարանների և մշակութային կենտրոնների վերանորոգում» սուբվենցիոն ծրագրի շրջանակում ընթացքի մեջ են Ալիխանյանի անվան տիկնիկային թատրոնի շենքի և տանիքի վերանորոգման աշխատանքները, որի նախահաշվային ընդհանուր արժեքը կազմում է 71 մլն 741 հազար դրամ՝ 45 տոկոս պետության մասնակցությամբ։ Սուբվենցիոն ծրագրով կնորոգվի նաև «Մարիամ և Երանուհի Ասլամազյան քույրերի պատկերասրահի» փայտե պատշգամբը։ Մարզպետին ներկայացվել է, որ աշխատանքները դեռ չեն մեկնարկել, նախատեսվում է նախահաշվային ընդհանուր արժեքով 14 մլն 72 հազար դրամի աշխատանքների իրականացում։
Սուբվենցիոն ծրագրով Գյումրիում հիմնանորոգվում է 22 փողոց։ «Գյումրի համայնքի 22 փողոցների հիմնանորոգում» սուբվենցիոն ծրագրի հաստատված արժեքը 2 մլրդ 181 մլն դրամ է, մրցույթի արդյունքում ընդհանուր արժեքը կազմել է 1 մլրդ 998 մլն 646 հազար դրամ, որից կառավարության մասնաբաժինը կազմում է 45 տոկոս։ Շինաշխատանքներն իրականացվում են 5 ընկերությունների կողմից։
Շիրակի մարզպետարանի տեղեկատվության ու հասարակայնության հետ կապերի բաժնից «Արմենպրես»-ին տեղեկացրին, որ քաղաքում իրականացվող սուբվենցիոն ծրագրերի ընթացքը մարզային իշխանությունների հսկողության տակ է: Կատարվող աշխատանքների ընթացքին ծանոթանալու նպատակով մարզպետն անձամբ է լինում տարածքներում:
«Նշեմ, որ 2022-ին Գյումրիում կառավարություն-համայնք համագործակցության արդյունքում կիրականացվեն 6 սուբվենցիոն ծրագրեր՝ 53 ենթածրագրերով։ 3 մլրդ 394 մլն, որից 1 մլրդ 594 մլն-ը հատկացնում է կառավարությունը։ Մարզային իշխանությունը հետևողական է բոլոր ծրագրերի ընթացքին»,-«Արմենպրես»-ին տեղեկացրեց Շիրակի մարզպետարանի տեղեկատվության ու հասարակայնության հետ կապերի բաժնի պետ Արաքսյա Կիրակոսյանը:
ԱրմենուհիՄխոյան