Սեւան համայնքի մանկապարտեզներում ամփոփվել է հերթական տարեշրջանը

ԳԱՎԱՌ, 16 ՕԳՈՍՏՈՍԻ, ԱՐՄԵՆՊՐԵՍ։ Սեւան համայնքի 11 նախադպրոցական ուսումնական հաստատությունում կատարած աշխատանքներն ամփոփվել են «Հրաժեշտ մանկապարտեզին» հանդիսություններով:

Ինչպես «Արմենպրես»-ին տեղեկացրին Սեւանի համայնքապետարանի աշխատակազմից, միջոցառումների ծրագրերում ներառված էին նախադպրոցական կրթական համալիր ծրագրի բոլոր բաժինների կատարած աշխատանքները, որոնք արտացոլված էին մանկապարտեզի սաների երգերում, ոտանավորներում, պարային կոմպոզիցիաներում եւ բեմականացումներում:

Ստեղծագործական հետաքրքիր լուծումներով, ինքնատիպ մտահղացումներով աչքի են ընկել թիվ 1 «Բողբոջ» մսուր-մանկապարտեզի, թիվ 3 «Հեքիաթ» մանկապարտեզի, թիվ 4 «Գալիք» մսուր-մանկապարտեզի սաների ներկայացրած համարները:

Երաժշտական յուրօրինակ անցումներով են ներկայացել Գագարինի մսուր-մանկապարտեզի, Ծովագյուղի եւ Լճաշենի մանկապարտեզների ավագ խմբի սաները:

Հայրենասիրական կատարումներով եւ բեմականացումներով աչքի են ընկել թիվ 2 «Զարթոնք» մսուր-մանկապարտեզի , թիվ 3 «Հեքիաթ» մանկապարտեզի, Չկալովկայի, Զովաբերի մանկապարտեզների սաները։

«2021-2022 ուստարում Սեւան համայնքում գործող 11 մանկապարտեզներին հրաժեշտ տվեց 382 երեխա` 169 աղջիկ, 213 տղա:

Դդմաշեն եւ Վարսեր բնակավայրերի մանկապարտեզների փոքրիկները հրաժեշտ տվեցին մանկապարտեզին, եւ նրանցից 40-ը՝ 12 աղջիկ, 28 տղա, կհաճախի Դդմաշեն եւ Վարսեր միջնակարգ դպրոցների հենքի վրա գործող նախակրթարաններ:

Սեւանի «Բողբոջ» մանկապարտեզի հենքի վրա գործող նախակրթարանին հրաժեշտ տվեց 35 երեխա՝ 15 աղջիկ, 20 տղա, որոնք կհամալրեն առաջին դասարանցիների շարքերը:

Մեկնարկում է նոր տարեշրջանը, եւ Սեւան համայնքի ղեկավար Սարգիս Մուրադյանի կարգադրությամբ համայնքի նախադպրոցական ուսումնական հաստատություններում 2022 թվականի օգոստոսի 19-ը ներառյալ կազմակերպվելու է մինչեւ 2022 թվականի դեկտեմբերի 31-ը 6 տարին լրացող երեխաների ազատումը մախադպրոցական հաստատություններից, 2022 թվականի օգոստոսի 20-ից մինչեւ օգոստոսի 30-ը ներառյալ, ըստ տարիքային խմբերի, կազմակերպվելու է երեխաների ընդունելություն առկա եւ առցանց եղանակով»,-ներկացրին Սեւանի համայնքապետարանի աշխատակազմից:

Խոսրով Խլղաթյան