Կանադան Հարավային Կովկասում իր առաջին դեսպանությունը բացում է Հայաստանում․ ՀՀ ԱԳ նախարարը ողջունում է որոշումը

ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ։ Կանադան Հայաստանում դեսպանություն է բացում․ Կանադայի արտաքին գործերի նախարար Մելանի Ժոլին իր երկրի այդ որոշումը համարում է հայկական ժողովրդավարությանը Կանադայի աջակցության ավելացման կարևոր երաշխիք։

«Սա թույլ կտա ավելի ամուր կապեր հաստատել մեր երկրների միջև և կավելացնի Կանադայի աջակցությունը հայկական ժողովրդավարությանը: Քանի որ կայունություն ու անվտանգություն ապահովող կանոնները ենթարկվում են մարտահրավերների, Կանադան կաշխատի հանուն գլոբալ խաղաղության և ժողովրդավարության պաշտպանության»,-նշել է Կանադայի ԱԳ նախարարը «Թվիթեր»-ի իր միկրոբլոգում կատարված գրառման մեջ։

Canada is opening an embassy in Armenia. This will allow for stronger ties between our countries and increased Canadian support for Armenian democracy.

As the rules that ensured stability & security are challenged, Canada will work to protect peace & democracy globally.

— Mélanie Joly (@melaniejoly) June 29, 2022

ՀՀ արտաքին գործերի նախարար Արարատ Միրզոյանը ողջունել է ռեզիդենտ դեսպան ունենալու Կանադայի որոշումը։ «Սա աստիճանաբար զարգացող հայ-կանադական հարաբերությունների ևս մեկ հանգրվան է, որն էլ ավելի կամրապնդի ընդհանուր արժեքների վրա հիմնված մեր երկկողմ համագործակցությունը»,-նշել է նախարար Միրզոյանը։

We strongly welcome #Canada's decision to open Embassy in #Armenia with resident Ambassador. This is yet another milestone in progressively developing Armenian-Canadian relations which will further reinforce our bilateral #cooperation based on common values. pic.twitter.com/Trff34HDZ5

— Ararat Mirzoyan (@AraratMirzoyan) June 29, 2022

Հունիսի 28-ին ՀՀ ԱԳ նախարարը հեռախոսազրույց էր ունեցել իր կանադացի գործընկերոջ հետ։ Կողմերը գոհունակությամբ էին արձանագրել երկու երկրների միջև տարբեր ոլորտներում արդյունավետ համագործակցությունը և ընդգծել փոխադարձ հանձնառությունը՝ ջանքեր գործադրելու հայ֊կանադական հարաբերությունների հետագա խորացման ուղղությամբ: Նախարար Միրզոյանը ողջունել էր Եվրոպայում և Եվրոպական Միությունում Կանադայի հատուկ բանագնաց Ստեֆան Դիոնի՝ «Աջակցություն հայկական ժողովրդավարությանը» խորագրով զեկույցը, որը կարևոր դրույթներ է պարունակում՝ հայ-կանադական հարաբերությունների զարգացման նոր հնարավորությունների նախանշման առումով:

Դեսպան Դիոնն այս տարվա փետրվարին այցելել էր Հայաստան՝ տարբեր հանդիպումներում շեշտադրելով, որ Հայաստանը շարժվում է ժողովրդավարական բարեփոխումների կարևոր ուղով և իր առաքելության հիմնական նպատակը Կանադայի կողմից Հայաստանի ժողովրդավարական գործընթացին աջակցությունն է:

Այսպիսով՝ Կանադան Հարավային Կովկասում իր առաջին դեսպանությունը բացում է Հայաստանում։