Զոհված և անհետ կորած զինծառայողների հարազատները հանդիպել են փոխոստիկանապետ Արա Ֆիդանյանի հետ
1 րոպեի ընթերցում
ԵՐԵՎԱՆ, 3 ՆՈՅԵՄԲԵՐԻ, ԱՐՄԵՆՊՐԵՍ: Կառավարության շենքի դիմաց բողոքի ակցիա անցկացնող՝ Արցախյան 44-օրյա պատերազմում զոհված և անհետ կորած զինծառայողների մի խումբ հարազատներ հանդիպել են Հայաստանի ոստիկանության պետի տեղակալ Արա Ֆիդանյանի հետ:
«Արմենպրես»-ի փոխանցմամբ՝ նրանք հանդիպում են պահանջում վարչապետ Նիկոլ Փաշինյանի հետ: Լրագրողների հետ զրույցում հարազատներից մեկն ասաց, որ հանդիպելու են փոխոստիկանապետի հետ հասկանալու համար՝ կարո՞ղ է ոստիկանությունը միջամտել, որպեսզի վարչապետի հետ հանդիպումը կայանա:
Նա նաև հայտնեց, որ իրենք հանդիպում են պահանջում 1 շաբաթից 10 օրվա ընթացքում՝ հարգելով վարչապետի աշխատանքն ու հասկանալով, որ նա աշխատանքային խիտ գրաֆիկ ունի:
Ավելի վաղ վարչապետի հետ հանդիպում պահանջող զոհված և անհետ կորած զինծառայողների հարազատները փակել էին Տիգրան Մեծ պողոտան: Ոստիկանությունը փողոցը բացելու գործողություն էր իրականացրել, սակայն փողոցը բացվել է միայն այն բանից հետո, երբ պայմանավորվածություն է ձեռք բերվել փոխոստիկանապետ Արա Ֆիդանյանի հետ հանդիպման վերաբերյալ:
