Այս փուլը պետք է կարողանանք հաղթահարել. Գուրգեն Արսենյանը՝ սահմանային իրավիճակի մասին
2 րոպեի ընթերցում
ԵՐԵՎԱՆ, 2 ՕԳՈՍՏՈՍԻ, ԱՐՄԵՆՊՐԵՍ: ՀՀ ազգային ժողովի «Քաղաքացիական պայմանագիր» խմբակցության պատգամավոր Գուրգեն Արսենյանն անդրադարձավ սահմանային իրավիճակին, թե ինչու են ադրբեջանական զինված ուժերը մինչև այժմ գտնվում Հայաստանի տարածքում:
«Արմենպրես»-ի հաղորդմամբ՝ Արսենյանն այս մասին խոսեց լրագրողների հետ զրույցում:
Նա նախ շեշտեց՝ բոլորին էլ հուզում է, երբ տեսնում են ադրբեջանական կողմից գործողություններ, որոնց վերաբերյալ հնարավոր չէ ողջամիտ բացատրություններ տալ: Արսենյանը նշեց՝ դեմարկացիա դեռ չի արվել, դա առաջնային ու լրջագույն աշխատանք է:
«Խոսակցությունն այն մասին է, որ մինչև մենք չճշգրտենք սահմանները, չկրակենք իրար վրա: Մեր խնդիրն այս պահին իրար վրա չկրակելն է: Եթե իրենք կրակեցին, մենք էլ իրենց վրա կրակենք, մեր խնդիրը նախահարձակ չլինելն է: ՀՀ-ն պետք է կարողանա անցնել այս փուլը: Բոլորս էլ ծանր ենք տարել այն, ինչ տեղի է ունեցել, բոլորս էլ տեսել ենք, որ կորուստներ ենք ունեցել, ամեն մեկը մի կորուստ ունեցել է, բայց մենք պետք է կարողանանք այս փուլն անցնել: Եթե մենք չկարողացանք այս փուլը հաղթահարել պետական մտածողությամբ, կազմակերպված պետության մտածողությամբ, մենք երբեք դուրս չենք գա այս քննարկումներից»,- ասաց Արսենյանը:
Ըստ պատգամավորի՝ պետք է կարողանալ «հանձնել այդ քննությունը», ոչ թե թույլ տալ, որ ծանր հարվածը բոլոր համակարգերում վհատության բերի: Նա շեշտեց՝ Հայաստանի սոցիալական օղակները պետք է վերականգնեն իրենց արդյունավետությունը:
Միևնույն ժամանակ Արսենյանը վստահեցրեց, որ բոլոր ուղղություններով պետությունն աշխատում է:
«Որպես իշխանություն՝ մենք լուծելու ենք այն թնջուկները, որոնք կան»,-ասաց նա: