Ֆրանսիայում սահմանափակվել են բողոքի ակցիաները․ անվտանգության ապահովման համար կներգրավվի մինչև 70 հազար ոստիկան ու ժանդարմ

Ֆրանսիայի մի շարք քաղաքներում հոկտեմբերի 24-ին նախատեսված բողոքի ակցիաների առնչությամբ սահմանվել են հավաքների արգելքներ և անվտանգության ուժեղացված միջոցներ։ Ինչպես տեղեկացնում է «Արմենպրես»-ը, վկայակոչելով Associated Press-ը, ներքին գործերի նախարար Լորան Նունյեսը հայտնել է, որ ամբողջ երկրում կներգրավվի մինչև 70 հազար ոստիկան ու ժանդարմ։ Կկիրառվեն նաև ուղղաթիռներ, զրահամեքենաներ և ջրցան մեքենաներ։

Տեղական իշխանություններն արգելել են որոշ հավաքներ, այդ թվում՝ Լիոնում, Նիսում և Մոնպելիեում։ Փարիզում և Մարսելում նախատեսված են բողոքի երթեր։ Անվտանգության նկատառումներով Փարիզի մի շարք խոշոր թանգարաններ, այդ թվում՝ Լուվրն ու Օրսեն, հոկտեմբերի 24-ին փակ են։

Նշվում է, որ առնվազն տասը քաղաքներում սահմանված են պարետային ժամի տեղային միջոցներ։ Դրանք տարբեր քաղաքներում վերաբերում են որոշակի թաղամասերի, ժամերի կամ բնակչության խմբերի և չեն նշանակում ամբողջ քաղաքի տարածքում տեղաշարժի համընդհանուր արգելք։

Բողոքի շարժումը սկսվել է սեպտեմբերին՝ դպրոցներում ուսուցիչների պակասի, գերբեռնված դասարանների և կրթության անբավարար ֆինանսավորման դեմ աշակերտական ակցիաներից։ Հետագայում այն ընդլայնվել է՝ ներառելով նաև կյանքի թանկացման և սոցիալական անհավասարության դեմ պահանջներ, իսկ ցուցարարներին միացել են արհմիությունները։ Նախորդ շաբաթավերջի որոշ ակցիաներ ուղեկցվել են բախումներով, խանութների թալանով և գույքի վնասմամբ, ինչի կրկնությունը կանխելու անհրաժեշտությամբ են իշխանությունները հիմնավորում սահմանափակումները։