Պատմության հետագծով  

ԵՐԵՎԱՆ, 13 ՀՈՒԼԻՍԻ, ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ/ԱՐՄԵՆՊՐԵՍ: 1933 թ. հուլիսի 13-ին մահացել է Նար-Դոսը (Միքայել Զաքարի Հովհաննիսյան)՝ հայ գրող։ Նար-Դոսի ստեղծագործության մեջ հիմնականը մարդն է՝ իր մարդկայնական ու բարոյական հատկություններով։ Նրան բնորոշ են արդիականության սուր զգացողությունը, գեղարվեստական վարպետությունը։ Նար-Դոսը բարձր է գնահատել գրականության դերը հասարակական կյանքում։ Այս իմաստով նա հատկապես արժեքավորել է ռեալիստական գրական մեթոդը՝ շատ խիստ խոսելով նատուրալիզմի դեմ։ Ժամանակակիցները Նար-Դոսին հիշում են իբրեւ համեստ, պարզ եւ համակրելի անձնավորություն։ «Նար-Դոսը մեր խոսքի լուրջ վարպետներից է եւ մեր գրականության հարատեւ փառքերից մեկն է»,- գրել է Ավետիք Իսահակյանը։

-1936 թ. հուլիսի 13-ին ծնվել է Ալիսիա Կիրակոսյանը՝ հայ բանաստեղծուհի, ԱՄՆ իսպանախոս գրողների միության պատվավոր նախագահ, ՀՀ ԳԱԱ պատվավոր դոկտոր (2007)։

-1896 թ. հուլիսի 13-ին ծնվել է Վարդան Ատրյանը՝ հայ արձակագիր, լրագրող։

-1925 թ. հուլիսի 13-ին ծնվել է Սերո Աբրահամյանը՝ հայ բանաստեղծ, արձակագիր։

-1941 թ. հուլիսի 13-ին Չեռնոգորիայում ապստամբություն սկսվեց ֆաշիստական կարգերի դեմ։

-1841 թ. հուլիսի 13-ին Լոնդոնում Ռուսաստանի, Մեծ Բրիտանիայի, Ֆրանսիայի, Ավստրիայի եւ Պրուսիայի միջեւ ստորագրվեց համաձայնագիր, ըստ որի, խաղաղ պայմաններում Օսմանյան կայսրությանը պատկանող Բոսֆոր եւ Դարդանելի նեղուցներով արգելվում է ռազմական նավերի շարժը։

-1923 թ. հուլիսի 13-ին տեղադրվեց Հոլիվուդի առաջին նշանը՝ HOLLYWOOD մեծադիր տառերը։

-1930 թ. հուլիսի 13-ին Ուրուգվայում մեկնարկեց ֆուտբոլի աշխարհի առաջին առաջնությունը։

Ա. Հ.