Արմեն Սարգսյանի հետ հանդիպման գնացել են Վազգեն Մանուկյանը, Արթուր Վանեցյանը, Վահրամ Բաղդասարյանը և Արծվիկ Մինասյանը
1 րոպեի ընթերցում
ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: Հայաստանի Հանրապետության նախագահ Արմեն Սարգսյանի հետ մարտի 3-ին կայացած հանդիպմանը մասնակցել են Հայրենիքի փրկության շարժման վարչապետի միասնական թեկնածու Վազգեն Մանուկյանը, «Հայրենիք» կուսակցության նախագահ Արթուր Վանեցյանը, ՀՀԿ Գործադիր մարմնի անդամ Վահրամ Բաղդասարյանը և ՀՅԴ Գերագույն մարմնի անդամ Արծվիկ Մինասյանը:
Նախագահի աշխատակազմից «Արմենպրես»-ին տրամադրված հաղորդագրության մեջ նշվում է, որ զրուցակիցները մտքեր են փոխանակել երկրում ստեղծված ճգնաժամային իրավիճակի հանգուցալուծման, վերջին իրադարձություններով պայմանավորված լարվածության թուլացման ուղիների շուրջ: Շարժման ղեկավարները ներկայացրել են իրենց մոտեցումներն ու տեսակետները: