396.54
Ալեն Սիմոնյանը խոսել է «Իմ քայլը» լքած պատգամավորների հետ ունեցած տարաձայնությունների մասին
2 րոպեի ընթերցում
ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: «Իմ քայլը» խմբակցությունից դուրս եկած պատգամավորների հետ վաղուց լուրջ տարաձայնություններ են եղել: Ինչպես հաղորդում է «Արմենպրես»-ը, այս մասին լրագրողների հետ ճեպազրույցում ասաց ՀՀ ԱԺ փոխխոսնակ Ալեն Սիմոնյանը՝ անդրադառնալով հինգ պատգամավորների՝ խմբակցությունից դուրս գալու փաստին:
Լրագրողի հարցին, թե արդյոք հնարավոր է, որ թիմը նոր լքողներ լինեն, Սիմոնյանն ասաց. «Թիմը լքել ցանկացողներն արդեն լքել են այն: Չեմ բացառում, որ ինչ-որ գործընկերներ ոչ քաղաքական պատճառներով դուրս գան, մանդատը վայր դնեն:
Դուրս եկած պատգամավորների մասով կարող եմ ասել, որ իրենց հետ մինչև այս իրավիճակը լուրջ տարաձայնություններ ենք ունեցել և սպասել ենք, որ նրանք ինչ-որ պահի կլքեն թիմը»:
ԱԺ փոխխոսնակի գնահատմամբ՝ ստեղծված իրավիճակը ցույց տվեց, թե թիմը որքանով է ամուր: «Վստահ եմ, որ որևիցե իշխանություն չէր կարողանալու այսպես պինդ իրեն պահել»,- ասաց նա՝ գոհունակություն հայտնելով, որ դժվար վիճակից «Իմ քայլը» խմբակցությունը կարողացավ դուրս գալ ընդամենը 5 պատգամավոր կորցնելով:
Լեռնային Ղարաբաղի պատերազմից հետո իշխող կուսակցության խորհրդարանական խմբակցությունը լքեցին պատգամավորներ Վարդան Աթաբեկյանը, Գոռ Գևորգյանը, Թագուհի Թովմասյանը, Աննա Գրիգորյանը, Սոֆիա Հովսեփյանը:
Բաժանորդագրվեք մեր ալիքին Telegram-ում