388.06
Մեր դիրքորոշումներում որևէ փոփոխություն չկա. Գարեգին Բ-ն` վարչապետի հրաժարականը պահանջելու մասին
2 րոպեի ընթերցում
ԵՐԵՎԱՆ, 28 ՀՈՒՆՎԱՐԻ, ԱՐՄԵՆՊՐԵՍ: Ամենայն Հայոց կաթողիկոս Ն.Ս.Օ.Տ.Տ Գարեգին Բ-ն, անդրադառնալով ՀՀ վարչապետ Նիկոլ Փաշինյանի հրաժարականը պահանջելու հարցին, հայտնեց, որ իրենց համոզմունքներում ու դիրքորոշումներում որևէ փոփոխություն չի եղել: «Արմենպրես»-ի փոխանցմամբ` այս մասին Գարեգին Բ-ն ասաց «Եռաբլուր» զինվորական պանթեոնում լրագրողների հետ զրույցում:
«Մեր համոզումներում, մեր դիրքորոշումներում որևէ փոփոխություն չկա: Երբեք երկիրն այսպիսի ծանր իրավիճակում չի եղել, հայրենիքի նման կորուստ չենք ունեցել, երկիրը նման վտանգների առջև կանգնած չի եղել: Անորոշությունը վաղվա օրվա նկատմամբ այսպես տագնապեցնող չի եղել մեր ժողովրդի համար: Այս կացության մեջ եկեղեցին, բնական է, իր խոսքը պետք է ասեր, իր զգաստացնող խոսքը, իր, պատգամի կերպով բերվող խոսքը»,- ասաց Գարեգին Բ-ն:
Ամենայն Հայոց կաթողիկոսը հավելեց, որ եկեղեցին առաջնորդվում է ազգային և պետական շահերով, և եկեղեցու դիրքորոշումը, եթե համահունչ է այս կամ այն խմբակի, քաղաքական ուժի հայացնքներին, դա չպետք է մեկնաբանվի որպես կողմնակցություն այս կամ այն քաղաքական կուսակցությանը:
«Եկեղեցին վերքաղաքական կառույց է»,- եզրափակեց կաթողիկոսը:
Դեկտեմբերի 8-ին Ամենայն Հայոց կաթողիկոս Ն.Ս.Օ.Տ.Տ Գարեգին Բ-ն և Մեծի Տանն Կիլիկիո կաթողիկոս Արամ Ա-ն ՀՀ վարչապետ Նիկոլ Փաշինյանին հորդորել են հրաժարական ներկայացնել:
