1 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի էներգետիկայի նախարարությունը հայտարարել է սևծովյան շելֆում գազի հորատման աշխատանքների երկրորդ փուլի մեկնարկի մասին։ Ըստ Թուրքիայի Էներգետիկայի և բնական ռեսուրսների նախարար Ֆաթիհ Դոնմեզի՝ նոյեմբերի 5-ին թուրքական երկրաբանական-հետախուզական «Ֆաթիհ» նավը «Թյուրքալի-1» հորատանցքում սկսել է հորատման աշխատանքներ։ Ինչպես հաղորդում է«Արմենպրես»-ը, վկայակոչելով Դոնմեզի թվիթերյան գրառումը, հորատման աշխատանքները տևելու են 75 օր։
Օգոստոսի 21-ին Թուրքիայի նախագահ Էրդողանը հայտարարել էր Սև ծովում 320 մլրդ խորանարդ մետր (թարմացված՝ 405 մլրդ խորանարդ մետր) գազի պաշարներ հայտնաբերելու մասին և նշել էր, որ Սաքարյայի հանքավայրից գազի արդյունահանումը նախատեսվում է սկսել 2023 թ.։ Իսկ հոկտեմբերի 17-ին հայտարարել էր՝ Սաքարյայի գազի հանքավայրում հուլիսի 20-ից սկսված աշխատանքների բարեհաջող ավարտի մասին։
«Թյուրքալի-1» հորատանցքը գտնվում է «Թունա» հորատանցքից 4-5 կմ հեռավորության վրա, իսկ «Թունա-1» հորատանցքը գտնվում է սևծովյան Հերակլեա քաղաքի առափնյա գոտում։
Էմմա Արդարյան