2 րոպեի ընթերցում
ԳԱՎԱՌ, 12 ՄԱՅԻՍԻ, ԱՐՄԵՆՊՐԵՍ: Վարդենիս համայնքի մարզադաշտի հարակից տարածքում մայիսի առաջին տասնօրյակի ընթացքում իրականացվել է մեծաքանակ ծառատունկ` Վարդենիս համայնքի ղեկավար Արամ Մելքոնյանի, համայնքապետարանի աշխատակիցների, վարդենիսցի կամավորների մասնակցությամբ:
Ինչպես «Արմենպրես»-ին տեղեկացրեց Վարդենիսի համայնքապետարանի աշխատակազմի քարտուղար Արթուր Զարոյանը, ծառատնկման ծրագիրը Վարդենիս համայնքում իրականացվել է Էյ-Թի-Փի բարեգործական հիմնադրամի կողմից՝ Վարդենիսի համայնքապետարանի հետ համագործակցությամբ: Ծառատունկ կատարվել է նաեւ Չարենցի փողոցում: Ծառատնկման ծրագիրը ավարտի կհասցվի առաջիկա օրերի ընթացքում:
«Մարզադաշտին հարող տարածքում ստեղծվող զբոսայգին ընդգրկում է շուրջ մեկուկես հեկտար տարածք: Ընդհանուր առմամբ այստեղ ծրագրվել է տնկել շուրջ 4 000 հատ հացենու տնկի: Այսօրվա դրությամբ աշխատանքներն արված են կիսով չափ: 200 հատ դեկորատիվ ծառատեսակներ էլ տնկված են քաղաքի փողոցներում: Ծառատունկին ակտիվորեն մասնակցել են համայնքապետարանի եւ մեր ենթակայությամբ գործող հիմնարկների աշխատակիցներ, բազմաթիվ կամավորներ: Առաջիկա օրերին կիրականացնենք ծառատնկման երկրորդ փուլը: Ապագա զբոսայգում նախատեսվում է նաեւ ոռոգման համակարգի կառուցում: Համայնքապետարանը ստանձնում է ծառերի հետագա խնամքը: Վարդենիսի կոմունալ ձեռնարկությունում հրամանագրված այգեպանները կանեն հնարավորը, որպեսզի ապահովվի տնկիների կենսունակությունն ու հետագա աճը»,- նշեց Արթուր Զարոյանը:
Խոսրով Խլղաթյան