Պրեմիեր լիգայի վերսկսման ժամկետներ են նախանշվում 

ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: Անգլիայի ֆուտբոլի առաջնության վերսկսման հստակ ժամկետներ են քննարկվում:

«Արմենպրես»-ի հաղորդմամբ` այս մասին գրում է The Telegraph-ը: Ըստ պարբերականի, առաջնությունը կարող է վերսկսվել հունիսի 12-ին: Սակայն կազմակերպիչներն առաջնահերթ են համարում առաջնության ընթացքում անվտանգության բոլոր նորմերի պահպանումը:

Ավելի վաղ հայտնի էր դարձել, որ անգլիական Պրեմիեր լիգան ներկայացնող ակումբները կողմ են մրցաշրջանը վերսկսելուն:

Այժմ Պրեմիեր լիգայի կազմակերպիչներն աշխատանքներ են տանում կառավարությունից թույլտվություն ստանալու ուղղությամբ: Անգլիայում մարզումային գործընթացը կարող է սկսվել մայիսի 18-ին:

Հիշեցնենք, որ ապրիլի 3-ին Անգլիայի ֆուտբոլի առաջնությունը կրկին անժամկետ հետաձգվեց: Ի սկզբանե պլանավորվում էր առաջնությունը վերսկսել ապրիլի 30-ին: Սակայն կազմակերպիչները մտադիր են առաջնությունը շարունակել միայն կորոնավիրուսի պանդեմիան նահանջելուց հետո: Անգլիայի ֆուտբոլի առաջնությունը դադարեցվել էր մարտի 13-ին` կորոնավիրուսի պանդեմիայի պատճառով:

Պատրաստեց Վարվառա Հայրապետյանը