Ամեն ինչ հոսում է, ամեն ինչ փոփոխվում է. Շարմազանովը՝ Ծառուկյանի քաղաքականություն վերադառնալու մասին
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովի փոխնախագահ Էդուարդ Շարմազանովն անդրադարձել է ԲՀԿ նախկին առաջնորդ Գագիկ Ծառուկյանի՝ քաղաքականություն հնարավոր վերադարձին: «Արմենպրես»-ի հաղորդմամբ՝ Ազգային ժողովում լրագրողների հետ զրույցում, անդրադառնալով հարցին, թե ՀՀԿ-ն ի՞նչ տեսակետ ունի ԲՀԿ-ականների նախաձեռնության մասին, ովքեր հավաքվել էին Ծառուկյանի տան մոտ՝ նրան խնդրելով վերադառնալ քաղաքականություն, Շարմազանովը պատասխանեց. «Մեր կոշտ դիրքորոշումը բացահայտ կապված է եղել, կա ու կլինի երևույթների նկատմամբ: Բոլոր նման երևույթներին մենք ունեցել ենք նմանատիպ դիրքորոշում: Մեր դիրքորոշումը երբեք ուղղված չի եղել որևէ անձի»:
Հարցին, թե ո՞րն է իր դիրքորոշումն այս հարցի վերաբերյալ, նա պատասխանեց. «Ես` որպես իշխանության ներկայացուցիչ, մեջբերել եմ մեզնից 2500 տարի առաջ ապրած հին հույն փիլիսոփա Հերակլիտի միտքը. «Ամեն ինչ հոսում է, ամեն ինչ փոփոխվում է»:
Հոկտեմբերի 24-ին մի խումբ ԲՀԿ-ականներ ակցիա էին կազմակերպել ԲՀԿ նախկին առաջնորդ Գագիկ Ծառուկյանի տան մոտ՝ պահանջելով նրա վերադարձն ակտիվ քաղաքականություն: ԱԺ ԲՀԿ խմբակցության քարտուղար Վահե Էնֆիաջյանը ԱԺ-ում լրագրողների հետ զրույցում նշեց, որ Ծառուկյանն առայժմ չի արձագանքել ԲՀԿ-ականների ցանկությանը:
Բաժանորդագրվեք մեր ալիքին Telegram-ում