2 წუთი კითხვის
სომხეთიდან ევროკავშირის ქვეყნებში ექსპორტი 2026 წლის იანვარ-სექტემბერში, წინა წლის ანალოგიურ პერიოდთან შედარებით, 51%-ით გაიზარდა - 475 მილიონი დოლარიდან 717 მილიონ დოლარამდე.
„არმენპრესის“ ცნობით, ეს მონაცემები 6 ნოემბერს ეროვნულ ასამბლეაში ჟურნალისტებთან ბრიფინგზე ეკონომიკის მინისტრმა გევორგ პაპოიანმა წარადგინა, როდესაც საექსპორტო ბაზრების დივერსიფიკაციაზე საუბრობდა.
მინისტრმა აღნიშნა, რომ წარმოდგენილი მაჩვენებლები სომხური წარმოშობის პროდუქციას ეხება.
მის მიერ გამოქვეყნებული მონაცემებით, ბულგარეთში ექსპორტი 4,9-ჯერ გაიზარდა, მალტაში - 4,8-ჯერ, ავსტრიაში - 3,1-ჯერ, პოლონეთში - 3-ჯერ, ესტონეთში - 2,8-ჯერ, ხოლო სლოვენიაში - 2,7-ჯერ. ზრდა დაფიქსირდა ევროკავშირის სხვა მიმართულებებითაც.
„გავიტანეთ სხვადასხვა საქონელი: ხილ-ბოსტნეული, სასოფლო-სამეურნეო პროდუქცია, სამთო-მომპოვებელი ნედლეული, დანადგარ-მოწყობილობები და მაღალტექნოლოგიური პროდუქცია“, - განაცხადა პაპოიანმა.
მინისტრმა ბაზრების დივერსიფიკაციის პროცესი რუსული შეზღუდვების ფონზე ალტერნატიული მიმართულებების ძიებასაც დაუკავშირა.
„რუსეთის ფედერაციის მიერ დაწესებული შეზღუდვების შედეგად ჩვენთვის ახალი ბაზრები აღმოვაჩინეთ; სომხური პროდუქცია გამოჩნდა ევროკავშირში, ახლო აღმოსავლეთსა და ცენტრალური აზიის ქვეყნებში. სწორედ ამიტომ მიდის დივერსიფიკაცია საკმაოდ კარგი ტემპით“, - აღნიშნა მან.
პაპოიანის შეფასებით, ახალ ბაზრებზე გასვლამ სომხეთის ეკონომიკის კონკურენტუნარიანობის ამაღლებასაც შეუწყო ხელი. მან ხაზგასმით აღნიშნა, რომ მთავრობის მხარდამჭერმა ღონისძიებებმა სოფლის მეურნეობის პროდუქციის რეალიზაციის პრობლემების გადაჭრის შესაძლებლობა შექმნა.
სახელმწიფო მხარდაჭერის უწყვეტობაზე საუბრისას მინისტრმა ხაზი გაუსვა, რომ სუბსიდირება ეფექტიანობაზე უნდა იყოს დაფუძნებული.
ევროკავშირის მიმართულებით ექსპორტის 475 მილიონიდან 717 მილიონ დოლარამდე და 51%-ით ზრდის მაჩვენებლები პაპოიანმა 21 ოქტომბერსაც გაასაჯაროვა იანვარ-სექტემბრის მონაცემების შეჯამებისას.