რუსეთთან ჩვენი ურთიერთობები ღია და გულწრფელია - ნიკოლ ფაშინიანი

სომხეთი კვლავ აგრძელებს რუსეთის ფედერაციასთან ურთიერთობების მნიშვნელობის ხაზგასმას და მათ განვითარებას.

„არმენპრესის“ ცნობით, ამის შესახებ სომხეთის პრემიერ-მინისტრმა ნიკოლ ფაშინიანმა „ფეისბუკის“ საკუთარ გვერდზე გამოქვეყნებულ ვიდეოში განაცხადა, სადაც სომხეთის ბალანსირებულ და დამაბალანსებელ საგარეო პოლიტიკას შეეხო.

„ჩვენ არსებითად ვავითარებთ და მნიშვნელობას ვანიჭებთ რუსეთის ფედერაციასთან ჩვენს ურთიერთობებს. მე არაერთხელ მითქვამს, რომ რუსეთთან ჩვენი ურთიერთობები ტრანსფორმაციის ფაზაში იმყოფება“, - აღნიშნა მან.

პრემიერ-მინისტრის თქმით, იგი ამ პროცესს პოზიტიურად აფასებს.

„ტრანსფორმაციის ფაზას პოზიტიურად მივიჩნევ, რადგან, დიახ, ამ ახალი რეალობის პირობებში ჩვენ რუსეთთან ახალ ურთიერთობებს ვამყარებთ და დარწმუნებული ვარ, რომ ამ საქმეში წარმატებას მივაღწევთ“, - განაცხადა ფაშინიანმა.

მან ხაზგასმით აღნიშნა, რომ ამის ერთ-ერთი მთავარი წინაპირობა ურთიერთობების ღია და გულწრფელი ხასიათია.

„რუსეთთან ჩვენი ურთიერთობები ღიაა, გულწრფელია, ჩვენ ამ ურთიერთობებში არანაირი ბნელი კუთხე არ დაგვიტოვებია“, - განაცხადა პრემიერ-მინისტრმა.