აშშ-ში სომხეთის ელჩი „OpenAI Education“ სამიტში მონაწილეობდა

აშშ-ში სომხეთის რესპუბლიკის ელჩმა, ნარეკ მკრტჩიანმა სან-ფრანცისკოში, კომპანია OpenAI-ის სათავო ოფისში, „OpenAI Education“ სამიტში მიიღო მონაწილეობა.

ღონისძიებას ესწრებოდნენ იმ ქვეყნების წარმომადგენლები, რომლებიც უკვე თანამშრომლობენ კომპანია OpenAI-სთან ან დაინტერესებულნი არიან მსგავსი თანამშრომლობის შესაძლებლობებით.

„არმენპრესის“ ცნობით, საელჩოდან იტყობინებიან, რომ სამიტის ფარგლებში ელჩმა მკრტჩიანმა OpenAI-ის წარმომადგენლებთან განათლებისა და ხელოვნური ინტელექტის სფეროებში კომპანიასა და სომხურ მხარეს შორის შესაძლო თანამშრომლობის პერსპექტივები განიხილა.

ღონისძიების განმავლობაში ასევე მოეწყო მრგვალი მაგიდის დისკუსია, სხვადასხვა ქვეყნის განათლების სფეროს მაღალჩინოსნებისა და უნივერსიტეტების წარმომადგენლების მონაწილეობით.

დისკუსიისას ელჩი მკრტჩიანი სიტყვით გამოვიდა და წარადგინა სომხეთის რესპუბლიკის განათლების, მეცნიერების, კულტურისა და სპორტის სამინისტროს მიდგომები და განათლების სფეროში არსებული პრიორიტეტები.