3 წუთი კითხვის
ამერიკის შეერთებული შტატები დგას „ირანის მამაცი ხალხის“ გვერდით, ხოლო პრეზიდენტმა დონალდ ტრამპმა „ცალსახად განაცხადა, რომ ხოცვა-ჟლეტის შესაჩერებლად ყველა ვარიანტი მაგიდაზეა“. „არმენპრესის“ ინფორმაციით, ამის შესახებ გაერო-ს უშიშროების საბჭოს სხდომაზე განაცხადა გაერო-ში აშშ-ის ელჩმა მაიკ უოლცმა.
„ირანული რეჟიმის მიერ საკუთარი მოქალაქეების და საკუთარი ხალხის წინააღმდეგ გაშვებული ძალადობის მასშტაბს, ამ დონეზე რეპრესიებს, აქვს შედეგები საერთაშორისო მშვიდობისა და უსაფრთხოებისთვის“, - განაცხადა მან.
Reuters-ის ინფორმაციით, უოლცმა აღნიშნა, რომ ირანის ხალხი თავის თავისუფლებას ითხოვს ისე, როგორც არასდროს ისლამური რესპუბლიკის ისტორიაში.
„პრეზიდენტი დონალდ ტრამპი და ამერიკის შეერთებული შტატები დგანან ირანის მამაცი ხალხის გვერდით“, - თქვა მან და დასძინა, რომ „რეჟიმი, მიუხედავად ნებისმიერი გამართლებისა, არის ერთადერთი პასუხისმგებელი ირანის ხალხის ეკონომიკურ ტანჯვაზე და პასუხისმგებლობასაც ის აიღებს“.
„პრეზიდენტი ტრამპი არის ქმედებაზე ორიენტირებული ადამიანი და არა უსასრულოდ მოლაპარაკე, როგორც ამას გაერო-ში ვხედავთ. მან მკაფიოდ აღნიშნა, რომ ხოცვა-ჟლეტის შესაჩერებლად ყველა ვარიანტი მაგიდაზეა“, - განაცხადა უოლცმა.
მან უარყო ირანის მხრიდან გაჟღერებული ბრალდებები, თითქოს საპროტესტო აქციები „გარე შეთქმულებაა სამხედრო მოქმედებების წინასწარი ნიშნად“.
„მსოფლიომ ყველამ უნდა იცოდეს, რომ რეჟიმი დღეს უფრო სუსტია, ვიდრე ოდესმე, და სწორედ ამიტომ ავრცელებს ამ სიცრუეს ქუჩებში მყოფი ირანელი ხალხის ძალის გამო. მათ ეშინიათ. მათ საკუთარი ხალხის ეშინიათ“, - აღნიშნა უოლცმა.
გაერო-ს უშიშროების საბჭოს სხდომაზე სიტყვით გამოვიდნენ ასევე ირანის, ჩინეთისა და რუსეთის წარმომადგენლები, რომლებმაც გააკრიტიკეს აშშ-ის მუქარები ირანის წინააღმდეგ დარტყმების განხორციელების თაობაზე.
28 დეკემბრიდან ირანში მასშტაბური საპროტესტო აქციები მიმდინარეობს ირანული რიალის მკვეთრი გაუფასურებისა და მაღალი ინფლაციის ფონზე. ანტისამთავრობო გამოსვლებს თან ახლდა შეტაკებები და არეულობები. დასავლურმა მედიასაშუალებებმა, უფლებადამცველ ორგანიზაციებზე დაყრდნობით, 2500-ზე მეტი დაღუპულის შესახებ განაცხადეს, თუმცა ირანის საგარეო საქმეთა მინისტრმა Fox News-თან ინტერვიუში აღნიშნა, რომ დაღუპულთა რაოდენობა რამდენიმე ასეულს შეადგენს.
გაერომ მოუწოდა ყველა მკვლელობის დამოუკიდებელ გამოძიებას და გამოხატა წინააღმდეგობა დემონსტრანტების მიმართ სიკვდილით დასჯის შესაძლო გამოყენების მიმართ.