სომხეთისა და ერაყის ეკონომიკურ ურთიერთობებში ჯერ კიდევ დიდი, გამოუყენებელი პოტენციალია։ ქვეყნები აპირებენ კავშირების გაღრმავებას

ბოლო წლებში სომხეთსა და ერაყს შორის ეკონომიკურმა ურთიერთობებმა სერიოზული წინსვლა განიცადა, ხოლო წლის პირველი ნახევრის მონაცემებით სავაჭრო ბრუნვამ თითქმის ორჯერ მოიმატა. თუმცა, ორივე ქვეყანა მიიჩნევს, რომ ურთიერთობებში ჯერ კიდევ დიდია გამოუყენებელი პოტენციალი და გეგმავს თანამშრომლობის მიმართულებების გაფართოებას.

„არმენპრესის“ ინფორმაციით, ერევანში გაიმართა სომხეთის რესპუბლიკისა და ერაყის რესპუბლიკის ეკონომიკური თანამშრომლობის საკითხებისთვის მთავრობათშორისი ერთობლივი კომისიის მეოთხე სხდომა.

სომხეთის ეკონომიკის მინისტრმა გევორგ პაპოიანმა აღნიშნა: „ბოლო წლებში ჩვენს ორმხრივ ეკონომიკურ ურთიერთობებს მეტი დინამიკა შეემატა. დღეს აქ შევიკრიბეთ, რათა ეს ურთიერთობები გავამყაროთ და ახალ დონეზე ავიყვანოთ. სტატისტიკური მონაცემები ნათლად მოწმობს ჩვენი თანამშრომლობის სტაბილურ დინამიკას“.

მხოლოდ 2025 წლის პირველი ნახევრის მონაცემებით, სომხეთსა და ერაყს შორის სავაჭრო ბრუნვამ 171 მილიონ დოლარს გადააჭარბა, რაც თითქმის ორჯერ მეტია გასული წლის ანალოგიურ პერიოდთან შედარებით. 2024 წელს, წლიურ ჭრილში, სავაჭრო ბრუნვამ 246 მილიონ დოლარს გადააჭარბა, რაც 2023 წელთან შედარებით 36%-ით მეტია.

მინისტრის თქმით, მაჩვენებლები აჩვენებს სავაჭრო მოცულობის სტაბილურ ზრდას, თუმცა ისიც ცხადია, რომ ჯერ კიდევ არსებობს საკმაოდ დიდი, გამოუყენებელი რესურსი. „ეს ერთობლივი სხდომა მნიშვნელოვანი პლატფორმაა ახალი მიდგომების საპოვნელად და იმ ნაბიჯების დასაგეგმად, რომლებიც საშუალებას მოგვცემს ჩვენი ეკონომიკური და პოლიტიკური თანამშრომლობა უფრო ეფექტიანი გავხადოთ“, – აღნიშნა პაპოიანმა.

სხდომის ფარგლებში ასევე იგეგმება სომეხ და ერაყელ ბიზნესმენთა შეხვედრა. მინისტრის აზრით, ამ შეხვედრის შედეგად უახლოეს მომავალში ახალი მიმართულებები ჩამოყალიბდება თანამშრომლობისთვის.

პაპოიანმა ხაზი გაუსვა, რომ სომხური მხარე განსაკუთრებით არის დაინტერესებული ერაყის აღდგენის პროცესში მონაწილეობით. სომხური კომპანიები მზად არიან თავიანთი შესაძლებლობები გამოიყენონ მშენებლობის, ინფრასტრუქტურის განვითარების, საკვების მრეწველობისა და ჯანდაცვის სფეროებში.

სომხეთისთვის ასევე მნიშვნელოვანია თანამშრომლობის გაღრმავება აგრარულ სექტორში, ციფრულიზაციაში, კიბერუსაფრთხოებაში, მაღალტექნოლოგიებში, მეცნიერებასა და კულტურაში.

ერაყის სოფლის მეურნეობის მინისტრმა აბას ჯებურ ალ-მალექიმ აღნიშნა, რომ ერაყმა მიზნად დაისახა რეგიონულ და საერთაშორისო დონეზე თანამშრომლობის გაფართოება.

„ერაყი სომხეთს რეალურ პარტნიორად განიხილავს როგორც რეგიონულ, ისე საერთაშორისო დონეზე. გვჯერა, რომ დღევანდელი შეხვედრა მნიშვნელოვან ფაქტორად იქცევა ორმხრივი ურთიერთობების გაძლიერების პროცესში“, – განაცხადა მან.

ერაყული მხარე ელოდება, რომ სომხური კომპანიები აქტიურად ჩაერთვებიან ერაყულ პროექტებში, მათ შორის სოფლის მეურნეობისა და პროგრამული მომსახურების სფეროებში. გარდა ამისა, ერაყმა შემოგვთავაზა ერთობლივი კომიტეტის შექმნა, რომელიც ქვეყნებს შორის სავაჭრო-ეკონომიკურ კავშირებს კიდევ უფრო გააძლიერებს.

ერაყში სომხეთის ელჩმა რუბენ სოღოიანმა აღნიშნა, რომ ერაყი სომხეთის ერთ-ერთ ყველაზე მნიშვნელოვან და სანდო პარტნიორად ითვლება ახლო აღმოსავლეთში. „ერაყი ჩვენი მეორე სავაჭრო პარტნიორია რეგიონში და ცხადია, რომ ეს რიცხვები კიდევ უფრო გაიზრდება. როგორც ექსპორტისა და იმპორტის მიმართულებები, ისე თანამშრომლობის გეოგრაფია ერაყში შეიძლება მეტად მრავალფეროვანი გახდეს“, – თქვა ელჩმა.

სომხეთში ერაყის საქმეთა რწმუნებულმა მუჰამად ომერ სალაჰ ად-დინმაც აღნიშნა, რომ ქვეყნებს შორის უკვე ჩამოყალიბებულია სიღრმისეული ურთიერთობები, რასაც ადასტურებს მაღალი დონის ვიზიტების აქტიურობაც. „ერაყის მთავრობა ცდილობს, სომხეთთან პოლიტიკური დიალოგი გააქტიუროს და სხვადასხვა საერთაშორისო და რეგიონულ ორგანიზაციებში კანდიდატურების შეთანხმების საკითხებში ერთობლივად იმოქმედოს“, – თქვა მან.

მან ასევე მიულოცა სომხეთს აზერბაიჯანთან სამშვიდობო შეთანხმების წინასწარ ხელმოწერა, რაც, მისი თქმით, უსაფრთხოებასა და მშვიდობას მოუტანს სამხრეთ კავკასიის რეგიონს და ეკონომიკურ კავშირებს ახალ ბიძგს მისცემს.

სხდომის შედეგად მხარეებმა შეაჯამეს შესრულებული სამუშაო და მომავალი თანამშრომლობისთვის ახალი მიმართულებები დასახეს.

სხდომის ბოლოს ხელმოწერილი იქნა ოთხი დოკუმენტი: ერთობლივი სხდომის პროტოკოლი, ურთიერთგაგების მემორანდუმი სავაჭრო-სამრეწველო პალატებს შორის, სომეხ ბიზნესმენთა კავშირის და ერაყის სავაჭრო-სამრეწველო პალატის დოკუმენტი, ასევე ურთიერთგაგების მემორანდუმი სომხეთის მშენებელთა ასოციაციასა და ერაყის კონტრაქტორების ფედერაციას შორის.