რუბიომ იმედი გამოთქვა, რომ ვაშინგტონში დაიწყება სომხეთსა და აზერბაიჯანს შორის მშვიდობის ხელშეკრულება

აშშ-ის სახელმწიფო მდივანმა მარკო რუბიომ იმედი გამოთქვა, რომ სომხეთსა და აზერბაიჯანს 8 აგვისტოს მოაწერენ ხელს შეთანხმებას, რომელიც ორ ქვეყანას შორის მშვიდობის ხელშეკრულების დასაწყისი გახდება. „არმენპრესის“ ცნობით, ამის შესახებ მან განაცხადა EWTN ტელეარხთან ინტერვიუში.

„პრეზიდენტი ერთგულია მშვიდობის და ერთგულია იმისა, რომ იყოს მშვიდობის პრეზიდენტი. ასე რომ, ჩვენ ვიხილეთ, როდესაც ინდოეთი და პაკისტანი ომში შევიდნენ, ჩვენ პირდაპირ ჩავერთეთ და პრეზიდენტმა შეძლო მშვიდობის მიღწევა. უფრო ახლახან კამბოჯისა და ტაილანდის შემთხვევა, აზერბაიჯანი და სომხეთი... იმედი მაქვს, ამ პარასკევს მოვაწერთ ხელს შეთანხმებას და იქ დავიწყებთ მშვიდობის ხელშეკრულებას. კონგოს დემოკრატიული რესპუბლიკა რუანდა: 30-წლიანი ომი, 7 მილიონი მსხვერპლი, ჩვენ შევძელით მათ აქ ჩამოყვანა, რათა მოეწერათ ხელი“, - განაცხადა რუბიომ.

მან ასევე დაამატა, რომ მშვიდობა მარადიული არ არის, საჭიროა მუშაობა და მისი შენარჩუნება.

ადრე აშშ-ის პრეზიდენტმა დონალდ ტრამპმა განაცხადა, რომ ამერიკულმა მხარემ საკმაოდ ხანგრძლივად ითანამშრომლა სომხეთთან და აზერბაიჯანთან, რის შედეგადაც შესაძლებელი გახდა სომხეთსა და აზერბაიჯანს შორის „ისტორიული“ მშვიდობის დადება, რომელიც 8 აგვისტოს თეთრ სახლში გაიმართება.