1 წუთი კითხვის
გერმანიის საგარეო საქმეთა მინისტრი ანალენა ბერბოკი გამოუცხადებელი ვიზიტით ჩავიდა კიევში, რათა მხარდაჭერა გამოუცხადოს უკრაინას. როგორც „არმენპრესი“ იუწყება, ამის შესახებ განცხადება გერმანიის საგარეო საქმეთა სამინისტრომ გაავრცელა.
„იმ ვითარებაში, როდესაც აშშ-სა და რუსეთს შორის არსებული ჩიხური მდგომარეობა გრძელდება, უკიდურესად მნიშვნელოვანია, რომ ჩვენ, ევროპელები, დავანახოთ, რომ უპირობოდ ვდგავართ უკრაინის გვერდით და ვუჭერთ მხარს, განსაკუთრებით ახლა. სწორედ ამიტომ დღეს უკრაინაში ჩამოვედი“, – აღნიშნულია ბერბოკის სახელით გავრცელებულ განცხადებაში.
ბერბოკის თქმით, გერმანიის მომავალი მთავრობაც გააგრძელებს უკრაინის მხარდაჭერას.
„დღეს უკრაინას დამატებით 130 მილიონი ევროს ჰუმანიტარული დახმარება და სტაბილიზაციისთვის საჭირო სახსრები გადაეცემა“, – დაამატა მან.
DPA-ს ინფორმაციით, ბერბოკის ვიზიტი უსაფრთხოების მოსაზრებებიდან გამომდინარე წინასწარ არ გამოცხადებულა.