Հակակոռուպցիոն կոմիտեն բացահայտել է «Ուժեղ Հայաստան»-ի կողմից ընտրակաշառք տալու, անձանց նյութապես շահագրգռելու դեպքեր

Հայաստանի Հանրապետության հակակոռուպցիոն կոմիտեից հայտնում են՝ փաստական տվյալներ են ստացվել այն մասին, որ «Ուժեղ Հայաստան» կուսակցության Արմավիրի մարզի Բաղրամյան համայնքի տարածքային պատասխանատուն կուսակցության օգտին քվեարկելու պայմանով նույն համայնքի մի շարք ընտրողների խոստացել, ինչպես նաև տվել է ընտրակաշառք: «Արմենպրես»-ի փոխանցմամբ՝ Կոմիտեի տարածած հաղորդագրությանը կից հրապարակվել է նաև ձայնագրություն։

«Բացի այդ, նույն անձը Արմավիրի մարզի Բաղրամյան համայնքի մի շարք բնակիչների նյութապես շահագրգռելու եղանակով ապահովել է նրանց մասնակցությունը նշված կուսակցության հանրահավաքներին»,– ասված է կառույցի տարածած հաղորդագրության մեջ։

Դեպքի առթիվ ՀՀ հակակոռուպցիոն կոմիտեում նախաձեռնվել է քրեական վարույթ, ձերբակալվել են մի շարք անձինք, կատարվել են խուզարկություններ և վարութային այլ գործողություններ։

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: