Հայաստանն ու Բելառուսը մշակութային նոր կամուրջներ կկառուցեն. հուշագիր պատմության թանգարանների միջև
2 րոպեի ընթերցում
ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի պատմության թանգարանի տնօրեն Գրիգոր Գրիգորյանը և Բելառուսի պատմության ազգային թանգարանի տնօրեն Պավել Սապոտկոն դեկտեմբերի 3-ին ստորագրել են հուշագիր, որը կողմերին հնարավորություն կտա համագործակցել մշակույթի, գիտության բնագավառներում:
Ինչպես «Արմենպրես»-ին տեղեկացրին Հայաստանի պատմության թանգարանի հասարակայնության հետ կապերի բաժնից, հուշագրի շրջանակում կողմերը կարող են համատեղ ցուցահանդեսներ կազմակերպել, որոնց իրականացման կարգը որոշվելու է առանձին համաձայնագրերով, համատեղ համաժողովներ, սեմինարներ, թրեյնինգներ անցկացնել:
Հուշագրի համաձայն` թանգարանները կփոխանակվեն գիտակրթական նյութերով և հրատարակություններով, կիրականացնեն թանգարանային գործի վերաբերյալ դասընթացներ, լաբորատոր հետազոտություններ:
Հուշագիրը ստորագրվել է երեք տարով:
Հայաստանի պատմության թանգարանը պատմամշակութային, գիտահետազոտական խոշոր կենտրոն է, որը հիմնադրվել է 1919 թվականին: Թանգարանը կազմավորվել է Կովկասի Հայոց ազգագրական ընկերության, Նոր Նախիջևանի Հայկական հնությունների թանգարանների, Անիի Հնադարանի, Վաղարշապատի Մատենադարանի հավաքածուների հիման վրա:
Քսաներորդ դարասկզբին հիմնադրված Բելառուսի պատմության ազգային թանգարանը Բելառուսի նյութական հուշարձանների և հոգևոր մշակույթի ամենամեծ հավաքածուն ընդգրկող թանգարանն է: Թանգարանի ֆոնդերում պահվում են արժեքավոր փաստաթղթեր, հնատիպ գրքեր, երաժշտական գործիքների հավաքածուներ, զենքեր և այլ կարևոր ցուցանմուշներ: