2 րոպեի ընթերցում
ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Հայկական ջազի երևելիներ՝ կոմպոզիտոր, դաշնակահար Մարտին Վարդազարյանը, ջազմեն, դաշնակահար, Լևոն Մալխասյանը, դաշնակահար, կոմպոզիտոր, գործիքավորող Վահագն Հայրապետյանը, թառահար, կոմպոզիտոր Միքայել Ոսկանյանը և այլք Հայաստանի պետական ջազ նվագախմբի նվագակցությամբ “ArmJazzProject-part 2’’ համերգին հնչեցրին բացառապես հայ կոմպոզիտորների ստեղծագործություններ և մշակումներ:
«Արմենպրես»-ի հաղորդմամբ` երեկոն տեղի ունեցավ նոյեմբերի 27-ին Արամ Խաչատրյան համերգասրահում:
Ինքնատիպ համարով նվագախմբի հետ ելույթ ունեցավ նաև երջանկահիշատակ կոմպոզիտոր, դաշնակահար, ՀՀ ժողովրդական արտիստ Ստեփան Շաքարյանի որդին՝ դաշնակահար Հայկ Շաքարյանը, որը կատարեց հոր ստեղծագործությունը:
Ջազ նվագախմբի գեղարվեստական ղեկավար և դիրիժոր Արմեն Հյուսնունցն առանձնահատուկ շեշտեց, որ երաժշտական կոլեկտիվն իր բոլոր համերգային ծրագրերում աշխատում է ընդգրկել հայ կոմպոզիտորների գործեր:
«Սա երկրորդ համերգն է մի նախագծի, որը փորձում է ներկայացնել հայկական ջազային ժառանգությունը, որը սկիզբ է առնում հեռավոր 20-րդ դարի 30-ականներից: Պետական ջազ նվագախումբը ներկայացրեց ավագ, միջին և երիտասարդ կոմպոզիտորների գործեր՝ գրված կամ գործիքավորված ջազ նվագախմբի համար»,-նշեց Հյուսնունցը:
Նա հույս հայտնեց, որ նմանատիպ երեկոները, որոնք նվիրված են հենց հայկական ջազային ժառանգությանը, շարունակական բնույթ կկրեն:
Համերգը, որի ընթացքում հնչած յուրաքանչյուր ստեղծագործություն ընդունվեց բուռն ծափողջյուններով, նախաձեռնել էր TM Production-ը: