388.4
Տեղեկատվական համաշխարհային կոնգրեսը մեծամասշտաբ իրադարձություն է
2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Բարձր տեխնոլոգիաների համաշխարհային կոնգրեսին մասնակցելու համար Հայաստան է ժամանելու երկու հազարից ավելի հյուր: Այդ մասին կառավարության նիստում հայտարարեց Վարչապետ Նիկոլ Փաշինյանը:
«Շատ կարևոր է արձանագրել, որ առաջիկա օրերին Հայաստանում սկսվում է Տեղեկատվական համաշխարհային կոնգրեսը, որը մեծամասշտաբ իրադարձություն է: Ունենալու ենք 2000-ից ավելի հյուրեր, այդ թվում՝ պաշտոնական պատվիրակություններ: Կարծում եմ՝ սա շատ կարևոր իրադարձություն է Հայաստանը որպես տեխնոլոգիական երկիր աշխարհի քարտեզի վրա ևս մեկ անգամ ի ցույց դնելու և նոր խթան տալու տեխնոլոգիական ոլորտի զարգացմանը: Իհարկե, միջոցառումն իսկապես մեծամասշտաբ է, և ես համոզված եմ, որ Ոստիկանությունը, Ազգային անվտանգության ծառայությունը, Վարչապետի աշխատակազմը, նախարարությունները համապատասխան միջոցներ են ձեռնարկել՝ միջոցառումը բարձր մակարդակով անցկացնելու համար»,- «Արմենպրես»-ի փոխանցմամբ, ասաց վարչապետը:
Բարձր տեխնոլոգիական արդյունաբերության նախարար Հակոբ Արշակյանն ընդգծեց, որ կոնգրեսին մասնակցելու են ՏՏ ոլորտի համաշխարհային մի շարք խոշոր ընկերություններ, որոնց տարեկան շրջանառությունը հասնում է միլիարդավոր դոլարների:
Հյուրերի թվում են լինելու նաև Քիմ Քարդաշյանը, Ալեքսիս Օհանյանը, Սերժ Թանկյանը և այլք:
Բաժանորդագրվեք մեր ալիքին Telegram-ում
