368.59
Գարեգին Բ կաթողիկոսը գնահատել է կոնգրեսական Փալոնեի ջանքերը ՀՀ-ԱՄՆ կապերի ամրապնդման գործում
1 րոպեի ընթերցում
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է ԱՄՆ Ներկայացուցիչների պալատի անդամ, Կոնգրեսի հայկական հարցերով հանձնաժողովի համանախագահ Ֆրանկ Փալոնեին: «Արմենպրես»-ին այս մասին տեղեկացրին Մայր Աթոռի տեղեկատվական համակարգից:
Նորին Սրբությունը, ողջունելով Ֆրանկ Փալոնեի հերթական այցը Մայր Աթոռ, գնահատանքով անդրադարձ է կատարել հայ-ամերիկյան հարաբերությունների ամրապնդման գործում վերջինիս ներդրած հետևողական ջանքերին և Հայաստանի կողմից հաղթահարվող դժվարությունների նկատմամբ ցուցաբերած ուշադրությանը:
Ամենայն Հայոց Կաթողիկոսը և ԱՄՆ Կոնգրեսի հայկական հարցերով հանձնաժողովի համանախագահը խոսել են Մերձավոր Արևելքում տիրող իրավիճակի և քրիստոնեական համայնքների նվազման խնդրի մասին: Նրանք անդրադարձել են նաև Լեռնային Ղարաբաղի հակամարտության խաղաղ կարգավորման ուղղությամբ գործադրվող ջանքերին, Հայաստանի Հանրապետության առջև ծառացած մարտահրավերներին և Եկեղեցի-պետություն հարաբերություններին:
Վերջում Ամենայն Հայոց Կաթողիկոսն արդյունավոր առաքելություն է մաղթել Ֆրանկ Փալոնեին:
Բաժանորդագրվեք մեր ալիքին Telegram-ում