1 րոպեի ընթերցում
ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Աղթամարի Սուրբ Խաչ եկեղեցու լուսանկարների ցուցահանդեսը բացվել է Ստամբուլի Թոփքափը պալատին կից Այա Իրինի եկեղեցում: Այս մասին, ինչպես հաղորդում է «Արմենպրես»-ը, հայտնում է թուրքական «Timeturk» լրատվամիջոցը:
Ցուցահանդեսի բացման ժամանակ կազմակերպիչները ընթերցել են Թուրքիայի նախագահ Ռեջեփ Թայիփ Էրդողանի ուղերձը, որում նա Աղթամարի Սուրբ Խաչ եկեղեցին համարում է քրիստոնեական աշխարհի և հատկապես հայ ժողովրդի համար հոգևոր կարևոր կենտրոն: «Այս և նմանատիպ պատմամշակութային հուշարձանները մեր երկրի հարստությունն են»,- նշվել է Էրդողանի ուղերձում:
Բացման արարողությանը ներկա է եղել նաև Պոլսո Հայոց պատրիարքի տեղապահ Սահակ եպիսկոպոս Մաշալյանը: Նա, խոսելով եկեղեցու պատմության և յուրահատկությունների մասին, շեշտել է, որ այս իրադարձությունը շատ ավելին է, քան պարզապես ցուցահանդես, որը ընկալվում է, որպես շատ ավելի մեծ ծրագրի մի մասնիկ: Մաշալյանի խոսքով՝ միջոցառումը նաև նմանատիպ հուշարձանների միջազգային ճանաչմանն ուղղված քայլ է:
Ցուցահանդեսը բաց է լինելու 20 օր շարունակ: