Հուլիսը մարմնամարզիկների ամիսն էր. Հակոբ Սերոբյան
2 րոպեի ընթերցում
![Հուլիսը մարմնամարզիկների ամիսն էր. Հակոբ Սերոբյան](http://armenpress.am/resized/480/static/news/b/2019/07/981012.jpg)
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Հայաստանի մարմնամարզության հավաքականի գլխավոր մարզիչ Հակոբ Սերոբյանը գոհ է Եվրոպական խաղերում և Ունիվերսիադայում հայ մարզիկների արդյունքներից և հուլիսը համարում է մարմնամարզիկների ամիս:
«Արմենպրես»-ի մամուլի սրահում լրագրողների հետ հանդիպման ժամանակ Սերոբյանը շեշտեց, որ մեկ ամսվա ընթացքում մարմնամարզիկները մասնակցեցին 3 միջազգային, կարևորագույն մրցաշարերի` Եվրոպական խաղեր, աշխարհի երիտասարդների առաջնություն և Համաշխարհային Ունիվերսիադա:
«Մենք ակնկալիքներով էինք մեկնել Մինսկ, սակայն չեմպիոնության հույս չունեինք: Արթուր Դավթյանն արեց անհնարինը և մրցաձևում` հենացատկերում: Եթե նա այս նույն ցատկը կատարի նաև աշխարհի առաջնությունում կամ Օլիմպիական խաղերում, ապա միանշանակ կդառնա մեդալակիր: Իսկ Վահագն Դավթյանը վնասվածքով էր մասնակցում, սակայն իր մեջ ուժ գտավ և դարձավ Եվրոպական խաղերի փոխչեմպիոն»,- շեշտեց Սերոբյանը:
Հավաքականի մարզչի խոսքով` երիտասարդները ևս լավ են դրսևորել իրենց և ապացուցում են, որ նոր սերունդը արժանի փոխարինող կլինի: «Գագիկ Խաչիկյանը, ով աշխարհի առաջնությունում մեդալակիրներին զիջեց երկու տասներորդական, լավ փոխարինող է նժույգաթափերի մեր Եվրոպայի չեմպիոն Հարություն Մերդինյանին: Իսկ Արթուր Ավետիսյանի ելույթը Համաշխարհային ուսանողական խաղերում շատ մաքուր էր կատարված: Եվ նա արժանիորեն դարձավ չեմպիոն»,-ասաց նա:
Սերոբյանը փաստեց, որ իրենց մարզադահլիճը պետք է սկսեն վերանորոգել, և իրենք պատրաստվում են աշխարհի առաջնությանը նախապատրաստվել Թբիլիսում: Հավաքականից երկու մարզիկ կմասնակցեն Իսրայելի բաց առաջնությանը:
Ընտրանուց աշխարհի առաջնությանը կմասնակցեն Արթուր Թովմասյանը, Արթուր Դավթյանը և Հարություն Մերդինյանը: