Հարութ Փամբուկչյանն իր թիմով պատրաստ է «30 տարի անց «Հրազդան» մարզադաշտում» խորագրով մենահամերգին
2 րոպեի ընթերցում
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: Երգիչ, ՀՀ վաստակավոր արտիստ Հարութ Փամբուկչյանը, ում բացառիկ մենահամերգին մնացել են հաշված օրեր, մեծ պատասխանատվությամբ է պատրաստվում հունիսի 30-ին կայանալիք կարևոր իրադարձությանը:
«Արմենպրես»-ի հաղորդմամբ` մենահամերգի կազմակերպիչ Yeghoyan Production-ի ղեկավար, արտիստի ընկեր Խաչիկ Եղոյանի խոսքով` թիմով ամեն օր տարբեր առումներով պատրաստվում են համերգին՝ սկսած աթոռները լվանալուց ու նստատեղերին թղթեր փակցնելուց մինչև բեմը, լուսավորությունը, ձայնային տեխնիկան կարգավորելը:
«Բարդությունները շատ-շատ էին, քանի որ մենք գործ ունենք մի մարզադաշտի հետ, որտեղ մոտ 15 տարի ոչ մի միջոցառում չի կազմակերպվել: Բայց մեր սերը սեփական գործի հանդեպ ու Աստծո ողորմածությունը կարծես ուժ են տալիս հնարավորինս լավ իրականացնել մեր առջև դրված նպատակը»,-նշեց նա:
Եղոյանի խոսքով` Ձախ Հարութն արդեն երկու ամիս է՝ Հայաստանում է և ամբողջ թիմի հետ հավասար մասնակցում է բոլոր կազմակերպչական աշխատանքներին:
«Փամբուկչյանը տրամադրված է մարտական և, ինչպես ինքն է ասում, խաչը կհանի, կբարձրանա բեմ և նորից կկերտի մի գեղեցիկ երաժշտական պատմություն»,-շեշտեց Եղոյանը:
Անդրադառնալով տոմսերի վաճառքին` նա ասաց, որ տոմսերի մեծ մասը սպառվել է և Ձախ Հարութի երկրպագուներին հորդորեց շտապել ու ձեռք բերել վերջին տոմսերը: