1 րոպեի ընթերցում
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: «GALLUP International Association»-ի իրականացված հարցումների համաձայն Հայաստանում քաղաքացիները մարզպետներից ամենաբարձր գնահատականը տվել են Տավուշի մարզպետ Հայկ Չոբանյանի կատարած աշխատանքներին: «Արմենպրես»-ի փոխանցմամբ` այս մասին մայիսի 22-ին տեղի ունեցած մամուլի ասուլիսի ընթացքում ասաց «GALLUP International Association»-ի Հայաստանում լիիրավ անդամ «Էմ Փի ՋԻ» ՍՊԸ տնօրեն Արամ Նավասարդյանը:
«Քաղաքացիներին խնդրել ենք գնահատել մարզպետների աշխատանքը 1- 5 բալային սանդղակով, որտեղ 1-ը` նվազագույն, 5-ը առավելագույն գնահատականն է: Ամենաբարձր միջինացված գնահատականը ստացել է Տավուշի մարզպետ Հայկ Չոբանյանը` 4 բալ, նրան 3,8 բալով հաջորդում են Գեղարքունիքի մարզպետ Գնել Սանոսյանը և Արագածոտնի մարզպետ Դավիթ Գևորգյանը: Ամենացածր գնահատականը` 2,7 բալ, ստացել է Վայոց ձորի մարզպետ Տրդատ Սարգսյանը»,- ասաց Նավասարդյանը:
Հետազոտությունը Հայաստանում իրականացվել է ապրիլի 30-ից մայիսի 9-ն ընկած ժամանակահատվածում: Հարցումներին մասնակցել է 1108 քաղաքացի: