2 րոպեի ընթերցում
ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: ՀՀ երկրորդ նախագահ Ռոբերտ Քոչարյանի, նախկին փոխվարչապետ Արմեն Գևորգյանի, ՀԱՊԿ նախկին գլխավոր քարտուղար Յուրի Խաչատուրովի, Պաշտպանության նախկին նախարար Սեյրան Օհանյանի գործը քննող դատավոր Վարդան Գրիգորյանն ինքնաբացարկ է հայտնել:
«Արմենպրես»-ի հետ զրույցում՝ այս մասին ասաց ՀՀ դատական դեպարտամենտի արարողակարգի և հասարակայնության հետ կապերի վարչության պետ Արման Խաչատրյանը:
«Այո, դատավորն ինքնաբացարկ է հայտնել, այժմ էլ գործը հանձնվել է դատարանի գրասենյակ, որպեսզի էլեկտրոնային համակարգով, պատահականության սկզբունքով վերամակագրվի մեկ այլ դատավորի: Թե ինչ պատճառներով է ինքնաբացարկ հայտնել՝ տեղյակ չեմ, բավարար ինֆորմացիայի չեմ տիրապետում»,- նշեց Խաչատրյանը:
Ռոբերտ Քոչարյանի պաշտպաններից Հովհաննես Խուդոյանն էլ նշեց, որ իրենք դեռևս որոշումը չեն ստացել, ԶԼՄ-ներից են իմացել այդ տեղեկությունը: Պաշտպանն ընդգծեց, որ Գրիգորյանն իրավունք չուներ առանց մեղադրյալների խափանման միջոցների հարցը լուծելու ինքնաբացարկ հայտնել, իսկ խափանման միջոցի հարցը դատավորը չէր կարող լուծել առանց կողմերի մասնակցության:
2008 թվականի մարտի 1-2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ քրեական գործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին և ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը: Միքայել Հարությունյանի նկատմամբ հետախուզում է հայտարարվել, Յուրի Խաչատուրովը 5 միլիոն դրամ գրավի դիմաց ազատ է արձակվել, իսկ Ռոբերտ Քոչարյանը կալանավորվել է: Ռոբերտ Քոչարյանի պաշտպանները բողոքարկել էին կալանավորման որոշումը: