3 րոպեի ընթերցում
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: ՀՀ տնտեսական զարգացման և ներդրումների նախարարության հաշվարկներով Հայաստանում մշակող արդյունաբերության առնվազն 7.5- 8 տոկոս աճ ունենք: Դա նշանակում է, որ վերջնական արտադրանք ստեղծող ճյուղերն աճում են լավ տեմպերով:
«Արմենպրես»-ի հաղորդմամբ` այս մասին մայիսի 3-ին հրավիրված ասուլիսում ասաց ՀՀ տնտեսական զարգացման և ներդրումների նախարար Տիգրան Խաչատրյանը:
«Այս տարվա առաջին եռամսյակում ունենք 6.5 տոկոս տնտեսական ակտիվության աճ, որը միջին հաշվով համադրելի է նախորդ երեք տարիների տնտեսական ցուցանիշներին: Տնտեսական ակտիվության վրա ազդել է արդյունաբերական արտադրանքի ծավալների աճը` 2 տոկոսով: Դա համեմատաբար ցածր է առնվազն նախորդ երեք տարիների միջին ցուցանիշից: Լեռնահանքային ոլորտի արտադրանքում մոտ 20 տոկոս անվանական արժեքով անկում ենք ունեցել: Դա ունի երկու պատճառ՝ մետաղների համաշխարհային գներն ավելի ցածր են, քան 2018-ի առաջին եռամսյակում են եղել: Եվ դրանք մոտ 12-15 տոկոսով ավելի ցածր են հիմնական մետաղների՝ ալյումինի և պղնձի գծով: Արտահանվող ապրանքների մեջ մեծ տեսակարար կշիռ ունի նաև ալյումինի փայլաթիթեղը, որի գնագոյացման վրա ազդում է բորսայական գինը: Համապատասխանաբար, այդպիսի կրճատման ֆոնին լավ լուրն այն է, որ լավ տեմպերով է աճել մշակող արդյունաբերությունը: Մեր գնահատականներով առնվազն 7.5-8 տոկոս աճ ունենք: Դա նշանակում է, որ մեր տնտեսության այն ճյուղերը, որոնք հիմնված չեն հումքային ռեսուրսների վրա, այլ վերջնական արտադրանք են ենթադրում և իրենցից ներկայացնում են սպառման ապրանքներ, աճում են բավականաչափ լավ տեմպերով»,-ասաց Խաչատրյանը:
Նա նկատեց, որ տնտեսական ակտիվության վրա ազդած հաջորդ ցուցանիշը ծառայությունների աճի ցուցանիշն է՝ 17.3 տոկոս երեք ամսվա հանրագումարով: Դա բարձր է նախորդ տարիների ցուցանիշներից: Առնվազն երկու հատված կա, որոնք աճում են բավական լավ տեմպերով։ Դրանք ֆինանսական ծառայություններն են՝ բանկերը, ապահովագրական, վարկային կազմակերպություններ: Նախարարը նկատեց, որ ֆինանսական միջնորդության դերը բարձրանում է տնտեսության մեջ: Զբոսաշրջության ծառայությունները նախորդ ամսվա տվյալներով ևս կայուն աճի ցուցանիշներ ունեն:
Ներքին առևտրաշրջանառությունը ևս գնահատվել է բավականին բարձր ցուցանիշներով՝ 10 տոկոսը գերազանցող ակտիվություն ենք ունեցել, որը նախորդ տարիների նկատմամբ համադրելի ցուցանիշ է: Նախարարը նշեց, որ տարվա ընթացքում ևս ակնկալում են բարձր ցուցանիշներ: