Աննա Վարդապետյանն ընդունել է ԵԽ Մարդու իրավունքների քաղաքականության և համագործակցության բաժնի ղեկավարի գլխավորած պատվիրակությանը
2 րոպեի ընթերցում
ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետության արդարադատության նախարարի տեղակալ Աննա Վարդապետյանն այսօր ընդունել է Եվրոպայի խորհրդի Մարդու իրավունքների քաղաքականության և համագործակցության բաժնի ղեկավար Միխայիլ Լոբովի գլխավորած պատվիրակությանը:
Ինչպես «Արմենպրես»-ին հայտնեցին ՀՀ արդարադատության նախարարության տեղեկատվության և հասարակայնության հետ կապերի վարչությունից, հանդիպմանը մասնակցել է նաև ԵԽ երևանյան գրասենյակի ղեկավար Նատալյա Վուտովան:
Հանդիպման ընթացքում փոխնախարարը ԵԽ գործընկերներին ներկայացրել է Հայաստանի Հանրապետության կողմից մշակվող Քրեական և Քրեական դատավարության օրենսգրքերի նախագծերի ուղղությամբ տարվող աշխատանքների ընթացքը: Աննա Վարդապետյանն ընդգծել է, որ Արդարադատության նախարարությունն ունի հստակ վերջնաժամկետներ նախագծերը Խորհրդարան ներկայացնելու համար:
Միխայիլ Լոբովը շնորհակալություն է հայտնել հանդիպման համար և կարևորել վերոնշյալ օրենքների նախագծերի մշակման աշխատանքները:
Փոխնախարար Վարդապետյանը գործընկերների հետ քննարկել է նաև Վարչական իրավախախտումների և Քրեակատարողական օրենսգրքերի նախագծերի մշակման գործընթացը՝ ընդգծելով, որ Արդարադատության նախարարությունը կարևորում է այս չորս նախագծերի միաժամանակյա մշակումն ու ընդունումը, որպեսզի բացառվեն հակասություններն ու համընկնումները տարբեր օրենսգրքերի նախագծերում առկա իրավակարգավորումներում:
Կողմերը քննարկել են նաև նախագծերի մշակման աշխատանքներին ԵԽ աջակցության ձևաչափերը՝ փորձագետների ներգրավման, միջխմբային քննարկումների կազմակերպման, հանրային քննարկումների և Խորհրդարանում աշխատանքային խմբերի մասնակցությամբ քննարկումների կազմակերպման հարցերում:
Հանդիպման ավարտին կողմերը վերահաստատել են սերտ համագործակցության պատրաստակամությունը: