3 րոպեի ընթերցում
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ:Հայոց ցեղասպանության զոհերի հիշատակի օրվան` ապրիլի 24-ին ընդառաջ, Կինոյի տան փոքր դահլիճում ցուցադրվեց Վիգեն Չալդրանյանի «Ապրիլ» կինոնկարը:
«Արմենպրես»-ի հաղորդմամբ`արձակագիր Ռուբեն Հովսեփյանի սցենարով նկարահանված ֆիլմում խաղացել են դերասաններ Լևոն Ներսիսյանը, Կարեն Ջանիբեկյանը, Անահիտ Ղուկասյանը և այլք:
«Սա Վիգեն Չալդրանյանի առաջին ֆիլմն էր. և՛ դերասանական կազմի համար էր այն հետաքրքիր, և՛ ռեժիսորի: Նկարահանումներն իրականացվում էին Արամուս գյուղում, մթնոլորտը շատ ջերմ էր, մենք հաճույք էինք ստանում մեր աշխատանքից, իսկ Վիգենը չէր ծանրացնում ոչինչ, պարզապես ասում էր, թե ինչ է ցանկանում ստանալ ու վերջ»,-ասաց դերասանուհի Անահիտ Ղուկասյանը:
Նրա խոսքով՝ «Ապրիլը» պատկանում է այն կինոնկարների շարքին, որոնք անհրաժեշտ են, որ երիտասարդությունը երբեք չմոռանա այն արհավիրքը, որի միջով անցել են մեր պապերը:
Երևանի մամուլի ակումբ հասարակական կազմակերպության խմբագիր Հերիքնազ Հարությունյանը խոստովանեց, որ շատ է սիրում ֆիլմը: «Հրաշալի դերասանական կազմ է ընդգրկված. Լևոն Ներսիսյանն իմ դասախոսն էր, և մենք նրան երկրպագում էինք: Ֆիլմի ասելիքը շատ խորն է. այն հորդորում է հողին կպած մնալ ու չհեռանալ արմատներից: Հերոսներից մեկն ասում է՝ փրկվել են ցեղասպանությունից, կարողացել են ստեղծել իրենց օջախը, և այն պարզապես չի կարելի տալ ուրիշին: Ասես հերոսներն իրենց մի մասնիկն են բերել Ավետյաց երկրից և չեն ցանկանում, որ բան պակասի, ուզում են շենացնել երկիրը»,-պատմեց Հարությունյանը:
Նա ընդգծեց, որ ֆիլմում կարմիր գծի պես անցնում է այն միտքը, որ ճիշտ է՝ հայերը կոտորվել են, բայց պայքարել են ու չեն կորցրել արժանապատվությունը:
«Ապրիլ» կինոնկարը նկարահանվել է 1985 թվականին«Հայֆիլմ» կինոստուդիայում:
Ֆիլմի գործողությունները ծավալվում են հայկական լեռնային մի գյուղում: Կինոժապավենում նկարագրվում են իրադարձություններ, որոնք տեղի են ունենում 1980 թվականի ապրիլի 24-ին` Եղեռնի զոհերի հիշատակի օրը։
Ֆիլմի հերոսները կոտորածից հրաշքով փրկվածներն ու նրանց սերունդներն են, ովքեր հիշում են ազգային պատմության դասերը և փոխանցում իրենց երեխաներին ու թոռներին: