1 րոպեի ընթերցում
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: 32-րդ ամառային Օլիմպիական խաղերի` Տոկիո-2020-ի տոմսերն առաջին անգամ վաճառքի կհանվեն մայիսի 9-ին:
«Արմենպրես»-ի հաղորդմամբ` այս մասին հայտնում է խաղերի կազմկոմիտեն: Տոմսերը գնելու հնարավորությունը կխաղարկվի հատուկ վիճակախաղի միջոցով: Ցանկության դեպքում երկրպագուները պետք է հատուկ կերպով գրանցվեն Օլիմպիական խաղերի կայքէջում և թողնեն համապատասխան դիմում: Գնորդները պետք է լինեն Ճապոնիայի բնակիչներ: Խաղարկության արդյունքները կհայտարարվեն հունիսի 20-ին:
Իսկ ահա աշնանը կսկսվի տոմսերի վաճառքի երկրորդ փուլը:
Տոկիոյի 32-րդ ամառային Օլիմպիական խաղերի կազմկոմիտեն արդեն իսկ հասցրել է ներկայացնել խաղերի ջահը: Օլիմպիական խաղերի ջահը կշռում է 1,2 կգ և ունի ոսկե սակուրայի տեսք: Ջահը վերևից հիշեցնում է սակուրայի ծաղիկ, որը զուգորդվում է Ճապոնիայի հետ:32-րդ ամառային Օլիմպիական խաղերի կրակը կվառվի 2020 թվականի մարտի 11-ին, ըստ ավանդույթի, Հունաստանում: Այն Ճապոնիա կտեղափոխվի 2020 թվականի մարտի 20-ին: Իսկ ջահի փոխանցումավազքը կսկսվի Ֆուկուսիմայում: 2020 թվականի Տոկիոյի Օլիմպիական խաղերը կմեկնարկեն հուլիսի 24-ին և կեզրափակվեն օգոստոսի 9-ին: