2 րոպեի ընթերցում
ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: ՀՀ ազգային ժողովի արտահերթ նիստի համար քվորում չի ապահովվել, քանի որ «Իմ քայլը» խմբակցության միխումբ պատգամավորներ մեկնել են Արցախ: Փոխխոսնակ Ալեն Սիմոնյանը վստահեցնում է՝ քվորում չապահովելու համար հատուկ միտում չի եղել:«Արմենպրես»-ի հաղորդմամբ՝ Սիմոնյանն այս մասին ասաց Ազգային ժողովում լրագրողների հետ զրույցում:
«Ոչ մի հատուկ բան չկար: Ուղղակի տեխնիկական խնդիր էր: Որոշ մասը մի քիչ շուտ էր մեկնել Արցախ: Չեմ կարծում, թե սա ինչ-որ ձևով խաթարում է գործունեությունը, չեմ կարծում, որ սրանով մենք ինչ-որ բան բաց կթողնենք: Համենայնդեպս, լավ չէ, որ պատգամավորները ճիշտ չեն հաշվարկել, կարելի էր այնպես անել, որ քվեարկությունից հետո մեկնեին»,-մեկնաբանեց Ալեն Սիմոնյանը:
Խոսելով այցի նպատակների մասին՝ փոխխոսնակն ասաց՝ որևէ հատուկ պայմանավորվածություն չի եղել, որ մեկնեն այն ժամանակ, երբ պետք է կայանա Փաշինյան-Ալիև հանդիպումը։ Սակայն նա կարծում է, որ այդ համատեքստում այս այցը միայն դրական ազդեցություն կունենա:
Պատգամավորները, այնուամենայնիվ, ժամը 10-ից սկսած՝ 4 ժամվա ընթացքում կարող են կրկին գրանցվել: Երբ քվորումի համար անհրաժեշտ պատգամավորների քանակ կապահովվի, կկարողանան սկսել նիստը:
Մարտի 29-ի նիստի օրակարգում պետք է լիներ «Ազգային ժողովի կանոնակարգ» ՀՀ սահմանադրական օրենքում փոփոխություններ կատարելու մասին» եւ «Սահմանադրական դատարանի մասին» ՀՀ սահմանադրական օրենքում փոփոխություններ եւ լրացումներ կատարելու մասին» օրենսդրական փաթեթի երկրորդ ընթերցմամբ քվեարկությունը: