2 րոպեի ընթերցում
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: ՀՀ կրթության և գիտության նախարարությունը «Կրթության բարելավում» ծրագրի շրջանակում նախատեսում է սկսել Երևանում և մարզերում յոթավագ դպրոցի շենքերի նորոգման աշխատանքները:
«Արմենպրես»-ի փոխանցմամբ` այս մասին «Ֆեյսբուք»-ի իր էջում գրել է ՀՀ կրթության և գիտության նախարար Արայիկ Հարությունյանը:
«Այս աշխատանքների արդյունքում կբարձրացնենք դպրոցների սեյսմականության մակարդակը, կբարեկարգենք տանիքները, ջրամատակարարման, կոյուղու, էլ. մատակարարման, օդափոխության, հակահրդեհային ազդանշանման, անվտանգության և այլ համակարգերը: Կհիմնանորոգենք սպորտային հրապարակներնու կստեղծենք նորերը։ Նախատեսվում են նաև ներքին հարդարման աշխատանքներ։
Այս տարի կսկսեն վերանորոգվել հետևյալ ավագ դպրոցները`Երևանի Ա. Ղարիբյանի անվան թիվ 142 ավագ դպրոց, Երևանի Տ. Շևչենկոյի անվան թիվ 42 ավագ դպրոց, Խ. Աբովյանի անվան ՀՊՄՀ հենակետային ավագ դպրոց, Շիրակի մարզի Գյումրու ակադեմիական վարժարան, Արթիկի թիվ 3 ավագ դպրոց, Սյունիքի մարզի Գորիսի Ա. Բակունցի անվան թիվ 1 ավագ դպրոց, Գեղարքունիքի մարզի Սևանի ավագ դպրոց»,- նշել է նախարարը:
Հարությունյանը հավելել է, որ նորոգման կարիք ունեցող դպրոցների ծրագիրն իրականացվելու է փուլ առ փուլ: